ກອງປະຊຸມລັດຖະມົນຕີກະຊວງປ້ອງກັນປະເທດອາຊຽນຄັ້ງທີ 11 ແລະ ກອງປະຊຸມເປີດກວ້າງລັດຖະມົນຕີກະຊວງປ້ອງກັນປະເທດອາຊຽນຄັ້ງທີ 4 ໄດ້ຈັດຂຶ້ນຢູ່ເຂດທ່າເຮືອເສລີຄລາກ ແຂວງ ປຳປັນກາ ປະເທດຟິລິບປິນໃນວັນທີ 23 ຕຸລານີ້ ແລະ ຫຼັງສຳເລັດກອງປະຊຸມ, ລັດຖະມົນຕີກະຊວງປ້ອງກັນປະເທດຂອງ 10 ປະເທດໃນອາຊຽນ ໄດ້ອອກຖະແຫຼງການຮ່ວມ ໂດຍຕົກລົງໃຫ້ຈັດກອງປະຊຸມເປີດກວ້າງລັດຖະມົນຕີກະຊວງປ້ອງກັນປະເທດອາຊຽນໃນແຕ່ລະປີ ເຊິ່ງເດີມກຳນົດຈັດຂຶ້ນເທື່ອໜຶ່ງແຕ່ລະ 2 ຫຼື 3 ປີ ເພື່ອເພີ່ມທະວີການຮ່ວມມືດ້ານການປ້ອງກັນປະເທດລະຫວ່າງບັນດາປະເທດໃນອາຊຽນ ແລະ ອາຊຽນກັບປະເທດຄູ່ສົນທະນາ ເພື່ອປ້ອງກັນບໍ່ໃຫ້ລັດທິກໍ່ການຮ້າຍແຜ່ຂະຫຍາຍຢູ່ອາຊີຕາເວັນອອກສຽງໃຕ້ ແລະ ປົກປັກຮັກສາສັນຕິພາບແລະສະຖຽນລະພາບຂອງພາກພື້ນ.
ຖະແຫຼງການລະບຸວ່າ: ບັນດາປະເທດໃນອາຊຽນສະໜັບສະໜູນລັດຖະບານຟິລິບປິນໃຊ້ການເຄື່ອນໄຫວການທະຫານເພື່ອປາບປາມກຸ່ມກໍ່ການຮ້າຍຢູ່ເມືອງມາລາວີ ທາງພາກໃຕ້ຟິລິບປິນ ແລະ ເນັ້ນຍົກລະດັບການຮ່ວມມືດ້ານການປ້ອງກັນປະເທດແລະຄວາມໝັ້ນຄົງໃນພາກພື້ນ ໂດຍຜ່ານການຊົມໃຊ້ຂ່າວລັບຮ່ວມກັນ, ເພີ່ມທະວີການຕິດຕາມຄວບຄຸມ, ເສີມສ້າງຈິດສຳນຶກຕໍ່ຄວາມໝັ້ນຄົງໃຫ້ສາທາລະນະຊົນ ແລະອື່ນໆ.
ຖະແຫຼງການຍັງລະບຸຕື່ມວ່າ: ບັນດາຝ່າຍທີ່ກ່ຽວຂ້ອງຂອງປະເທດຕ່າງໆໃນອາຊຽນຄວນເພີ່ມທະວີຄວາມໄວ້ເນື້ອເຊື່ອໃຈກັນ, ຮັກສາຄວາມທຸ່ນທ່ຽງແລະຄວາມອົດກັ້ນ ເພື່ອຫຼີກເວັ້ນການນຳໃຊ້ການເຄື່ອນໄຫວໃດໆ ທີ່ອາດຈະສົ່ງຜົນເຮັດໃຫ້ສະຖານະການເຄັ່ງຕຶງຂຶ້ນຕື່ມ ແລະ ຈັດຕັ້ງປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້"ຢ່າງມີປະສິດທິຜົນຮອບດ້ານ.