ການພົບປະກັນບໍ່ເປັນທາງການຂອງລັດຖະມົນຕີປ້ອງກັນປະເທດຈີນ-ອາຊຽນຄັ້ງທີ 7 ໄດ້ຈັດຂຶ້ນຢູ່ເມືອງຄລັກປະເທດຟີລິບປີນໃນຕອນບ່າຍວັນທີ 23 ຕຸລານີ້, ທ່ານຊາງວ້ານຊວນ ທີ່ປຶກສາແຫ່ງລັດທັງເປັນລັດຖະມົນຕີກະຊວງປ້ອງກັນປະເທດຈີນແລະລັດຖະມົນຕີປ້ອງກັນປະເທດຂອງ 10 ປະເທດອາຊຽນເຂົ້າຮ່ວມ.
ທ່ານຊາງວ້ານຊວນກ່າວວ່າ, ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ທີ່ພວມດຳເນີນນັ້ນແມ່ນກອງປະຊຸມຄັ້ງໜຶ່ງທີ່ສຳຄັນທີ່ສຸດທີ່ຈັດຂຶ້ນໃນໄລຍະສຸດທ້າຍແຫ່ງການສ້າງສັງຄົມອິ່ມໜຳສຳລາໃຫ້ສຳເລັດນຮອບດ້ານແລະສັງຄົມນິຍົມທີ່ມີສີສັນພິເສດຂອງຈີນກ້າວເຂົ້າສູ່ໄລຍະໃໝ່. ຈີນແລະປະເທດອາຊຽນເປັນປະເທດໃກ້ຄຽງແລະຢູ່ຮ່ວມກັນໂດຍສັນຕິ, ແມ່ນຄູ່ຮ່ວມຊະຕາກຳນຳກັນ. ຈີນຈະສືບຕໍ່ປະຕິບັດຕາມແນວຄິດການຕ່າງປະເທດອ້ອມຂ້າງທີ່ສະເໜີໂດຍທ່ານປະທານສີຈິ້ນຜີງທີ່ມີໄມຕີຈິດມິດຕະພາບ, ຄວາມຈິງໃຈ, ຕ່າງຝ່າຍຕ່າງມີຜົນປະໂຫຍດແລະກວມລວມ, ຕັ້ງໜ້າແລກປ່ຽນແລະຮ່ວມມືໃນຫຼາຍຂົງເຂດແລະຫຼາຍລະດັບກັບບັນດາປະເທດອາຊຽນ, ສ້າງສະພາບແວດລ້ອມທີ່ດີງາມແລະປອດໄພໃຫ້ແກ່ການຮ່ວມມື "ໜຶ່ງແລວທາງໜຶ່ງເສັ້ນທາງ", ເພື່ອສ້າງແລະປະກອບສ່ວນຫຼາຍກວ່າເກົ່າໃຫ້ແກ່ຄູ່ຮ່ວມຊະຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ.
ໂອກາດນີ້ຜູ້ນຳປ້ອງກັນປະເທດຂອງບັນດາປະເທດອາຊຽນກໍໄດ້ຊົມເຊີຍກອງປະຊຸມໃຫຍ່ຜູ້ແທນທົ່ວປນະເທດຂອງພັກກອມມູນິດຈີນທີ່ໄດ້ໄຂຂຶ້ນຢ່າງມີໄຊ, ຍ້ອງຍໍຊົມເຊີຍການປະກອບສ່ວນຂອງຈີນເພື່ອຮັກສາສັນຕິພາບແລະສະຖຽນລະພາບຂອງພາກພື້ນ, ພ້ອມກັນນີ້, ອາຊຽນກໍຍິນດີສືບຕໍ່ເພີ່ມທະວີການແລກປ່ຽນທາງຍຸດທະສາດກັບຈີນ, ລົງເລິກການຮ່ວມມືຕົວຈິງໃນຂົງເຂດປ້ອງກັນຊາດແລະຮັກສາຄວາມໝັ້ນຄົງ, ຮ່ວມກັນຮັກສາການພັດທະນາແລະຄວາມຈະເລີນຮຸ່ງເຮືອງຂອງພາກພື້ນ.