ກອງປະຊຸມການຮ່ວມມືປາບປາມຢາເສບຕິດລະຫວ່າງສອງຝ່າຍຈີນ-ອິນໂດເນເຊຍຄັ້ງທຳອິດ ໄດ້ໄຂຂຶ້ນຢູ່ນະຄອນຫຼວງຈາກາຕາປະເທດອິນໂດເນເຊຍໃນວັນທີ 24 ຕຸລານີ້.
ໂອກາດດັ່ງກ່າວ, ຜູ້ຕາງໜ້າສອງຝ່າຍ ໄດ້ແຈ້ງສະພາບການຫຼ້າສຸດ ແລະ ມາດຕະການຕົ້ນຕໍໃນວຽກງານປາບປາມຢາເສບຕິດຂອງປະເທດຕົນ ທັງໄດ້ແລກປ່ຽນແລະປຶກສາຫາລື ກ່ຽວກັບຫົວຂໍ້ຕ່າງໆ ເຊັ່ນ: ການສ້າງກົນໄກພົບປະປະຈຳປີ, ການສ້າງສາຍດ່ວນຕິດຕໍ່ພົວພັນ, ການກວດກາຢາເສບຕິດ, ການຕ້ານການຟອກເງິນ, ການຊ່ວຍເຫຼືອຍົກລະດັບເຈົ້າໜ້າທີ່ວິຊາການ ແລະ ການປົກປ້ອງສິດທິຜົນປະໂຫຍດຂອງຜູ້ຕ້ອງຫາຢາເສບຕິດສັນຊາດຈີນທີ່ຖືກກັກຂັງຢູ່ອິນໂດເນເຊຍ ທັງໄດ້ກ້າວເຖິງຂັ້ນການຮ່ວມມືທີ່ສຳຄັນຕ່າງໆ.
ຫຼັງກອງປະຊຸມ, ສອງຝ່າຍໄດ້ລົງນາມໃນ "ແຜນການປະຕິບັດງານກ່ຽວກັບການເສີມສ້າງການຮ່ວມມືປາບປາມຢາເສບຕິດ ລະຫວ່າງກົມປາບປາມຢາເສບຕິດກະຊວງປ້ອງກັນຄວາມສະຫງົບສາທາລະນະລັດປະຊາຊົນຈີນ ແລະ ຄະນະກຳມະການປາບປາມຢາເສບຕິດແຫ່ງຊາດອິນໂດເນເຊຍ".
ທັງນີ້ ສອງຝ່າຍ ໄດ້ປຶກສາ ແລະ ຕົກລົງວ່າ, ຈະປັບປຸງບູລະນະ ແລະ ເສີມສ້າງກົນໄກການຮ່ວມມືຕື່ມອີກ ເພື່ອເຮັດໃຫ້ການປາບປາມຢາເສບຕິດຂອງສອງປະເທດ ກໍຄື ຂອງພາກພື້ນໄດ້ຮັບປະສິດທິຜົນດີກວ່າເກົ່າຢ່າງແທ້ຈິງ ແລະ ຮ່ວມກັນຊຸກຍູ້ເສີມຂະຫຍາຍການຮ່ວມມືໃນວຽກງານປາບປາມຢາເສບຕິດລະຫວ່າງສອງປະເທດໃຫ້ພັດທະນາກ້າວສູ່ລວງເລິກຢ່າງແທ້ຈິງ.