ວັນທີ 28 ຕຸລານີ້, ກະຊວງປ້ອງກັນປະເທດສ.ເກົາຫຼີປະກາດວ່າ, ມື້ດຽວກັນ, ກອງປະຊຸມຮັກສາຄວາມໝັ້ນຄົງສ.ເກົາຫຼີອາເມລິກາຄັ້ງທີ 49 ໄດ້ຈັດຂຶ້ນຢູ່ນະຄອນຫຼວງເຊອູນ. ສອງຝ່າຍສ.ເກົາຫຼີແລະອາເມລິກາເຫັນດີຢ່າງເປັນເອກະສັນກັນໃຫ້ອາເມລິກາເພີ່ມການຈັດວາງອາວຸດຍຸດທະສາດຢູ່ສ.ເກົາຫຼີ, ເພື່ອປັບປຸງພັນທະມິດທາງການທະຫານຂອງສອງປະເທດຕື່ມອີກ.
ໃນງານຖະແຫຼງຂ່າວທີ່ຈັດຂຶ້ນພາຍຫຼັງການເຈລະຈາ, ທ່ານຊົງຢົງມູ ລັດຖະມົນຕີກະຊວງປ້ອງກັນປະເທດສ.ເກົາຫຼີກ່າວວ່າ, ເພື່ອບັນລຸເປົ້າໝາຍທີ່ໃຫ້ແຫຼມເກົາຫຼີປອດນິວເຄຼຍ, ສອງປະເທດສ.ເກົາຫຼີກັບອາເມລິກາຈະເພີ່ມທະວີຄວາມພະຍາຍາມໃນດ້ານການຕ່າງປະເທດ, ໃນຂະນະດຽວກັນ, ຖືການປ້ອງກັນຮ່ວມທີ່ເຂັ້ມແຂງຂອງສ.ເກົາຫຼີກັບອາເມລິກາເປັນໜູນຫຼັງ. ເພື່ອເພີ່ມທະວີການນາບຂູ່ທາງການທະຫານ, ສ.ເກົາຫຼີກັບອາເມລິກາເຫັນດີຢ່າງເປັນເອກະສັນກັນວ່າເປີດກວ້າງການຈັດວາງອາວຸດຍຸດທະສາດຂອງອາເມລິກາຢູ່ສ.ເກົາຫຼີ.
ທ່ານເຈມສ໌ ມາຕີສ ລັດຖະມົນຕີປ້ອງກັນປະເທດອາເມລິກາກ່າວວ່າ, ອາເມລິກາຈະບໍ່ຮັບຮອງເອົາວ່າສປປເກົາຫຼີມີອາວຸດນິວເຄຼຍ. ຖ້າສປປເກົາຫຼີສືບຕໍ່ດຳເນີນການເຄື່ອນໄຫວລູກສອນໄຟນຳວິຖີແລະອາວຸດນິວເຄຼຍຄືປັດຈຸບັນນີ້, ຈະນຳເອົາສິ່ງຂັດຂວາງໃຫຍ່ກວ່າເກົ່າໃຫ້ແກ່ການຮັກສາຄວາມໝັ້ນຄົງຂອງຕົນໃນທີ່ສຸດ. ພາຍໃຕ້ສະພາບການໃນປັດຈຸບັນ, ແຜນການແກ້ໄຂບັນຫານິວເຄຼຍແຫຼມເກົາຫຼີທີ່ສອງປະເທດສະໜັບສະໜູນແລະມີຜົນດີຫຼາຍທີ່ສຸດແມ່ນວິທີການຕ່າງປະເທດ, ແຕ່ເພື່ອຮັບປະກັນແຜນການການຕ່າງປະເທດສາມາດສຳເລັດຜົນ, ຕ້ອງການກຳລັງຕົວຈິງທາງການທະຫານທີ່ເຂັ້ມແຂງເປັນການຄ້ຳຊູ.
