ວັນທີ 28 ຕຸລານີ້, ພະແນກດັບເພີງແລະຂະແໜງການປ່າໄມ້ລັດກາລີຟໍເນຍປະເທດອາເມລິກາກ່າວວ່າ: ໄຟໄໝ້ປ່າທີ່ເກີດຂຶ້ນຢູ່ພາກເໜືອລັດກາລີຟໍເນຍທີ່ເຮັດໃຫ້ມີປະຊາຊົນ 42 ຄົນເສຍຊີວິດນັ້ນປັດຈຸບັນຍັງບໍ່ໄດ້ຖືກດັບມອດໝົດເທື່ອ. ໃນມື້ດັ່ງກ່າວ, ອາຄານອົງການປົກຄອງລັດກາລີຟໍເນຍໄດ້ຊັກທຸງຊາດລົງເຄິ່ງໜຶ່ງ ເພື່ອສະແດງຄວາມໄວ້ອາໄລຕໍ່ປະຊາຊົນທີ່ເສຍຊີວິດໃນເຫດການໄຟໄໝ້ດັ່ງກ່າວ.
ໂດຍກຳນົດເອົາວັນທີ 28 ຕຸລານີ້ເປັນວັນແຫ່ງຄວາມໄວ້ອາໄລຕໍ່ຜູ້ເສຍຊີວິດໃນໄຟໄໝ້ປ່າລັດກາລີຟໍເນຍ. ທ່ານ ເຈຣີ ບລອນ ເຈົ້າຄອງລັດກາລີຟໍເນຍໄດ້ໂພສ໌ປະກາດແຈງການ "ວັນແຫ່ງຄວາມໄວ້ອາໄລ" ລົງສື່ສັງຄົມອອນໄລ Twitter ວ່າ: ໄຟໄໝ້ປ່າທີ່ແຜ່ລາມພາກເໜືອລັດກາລີຟໍເນຍຄັ້ງນີ້ແມ່ນໄພພິບັດທີ່ມີຈຳນວນຜູ້ເສຍຊີວິດຫຼາຍທີ່ສຸດແລະມີຜົນເສຍຫາຍຮຸນແຮງທີ່ສຸດໃນປະຫວັດສາດລັດຕົນ.
ພະແນກດັບເພີງແລະຂະແໜງການປ່າໄມ້ລັດກາລີຟໍເນຍກ່າວວ່າ: ມາຮອດວັນທີ 28 ຕຸລານີ້, ໄຟໄໝ້ປ່າຍັງບໍ່ໄດ້ຖືກດັບມອດໝົດເທື່ອ. ຕາມສະຖິຕິຫຼ້າສຸດຂອງພະແນກຕົນສະແດງໃຫ້ເຫັນວ່າ: ໄຟໄໝ້ຄັ້ງນີ້ໄດ້ເຮັດໃຫ້ມີປະຊາຊົນຈຳນວນ 42 ຄົນເສຍຊີວິດ,ຫຼາຍຮ້ອຍຄົນບາດເຈັບ, ເນື້ອທີ່ປ່າໄມ້ທີ່ຖືກໄຟໄໝ້ໄດ້ມີເຖິງ 2 ແສນ 4 ໝື່ນ 5 ພັນກວ່າເຮັກຕາ. ສື່ມວນຊົນທ້ອງຖິ່ນໄດ້ອ້າງຕາມຄຳເວົ້າຂອງເຈົ້າໜ້າທີ່ລັດດັ່ງກ່າວມາລາຍງານວ່າ: ໄຟໄໝ້ປ່າຄັ້ງນີ້ໄດ້ເຮັດໃຫ້ມີຜົນເສຍຫາຍທີ່ມີມູນຄ່າເຖິງ 1 ຕື້ໂດລາສະຫະລັດ.
ຂ່າວແຈ້ງວ່າ: ວັນທີ 8 ຕຸລານີ້, ຢູ່ຫຼາຍແຫ່ງທາງພາກເໜືອລັດກາລີຟໍເນຍໄດ້ເກີດໄຟໄໝ້ປ່າຢ່າງກະທັນຫັນ,ຍ້ອນຖືກຜົນກະທົບຈາກລົມພັດຮຸນແຮງ,ໄຟໄດ້ແຜ່ລາມຢ່າງວ່ອງໄວໄປເຖິງຫຼາຍຕົວເມືອງທາງພາກເໜືອຂອງລັດກາລີຟໍເນຍ.