ພະແນກປ້ອງກັນຄວາມສະຫງົບແຂວງກວາງຕຸ້ງ ສປ ຈີນຖະແຫຼງໃນວັນທີ 28 ຕຸລານີ້ວ່າ: ວັນດັ່ງກ່າວ, ເຈົ້າໜ້າທີ່ຕຳຫຼວດໄດ້ຄຸມຜູ້ຖືກສົງໄສກໍ່ອາຊະຍາກຳຫຼອກລວງທາງໂທລະຄົມ 61 ຄົນຈາກກຳປູເຈຍກັບຄືນເມືອງກວາງໂຈ່ວແຂວງຂອງຕົນແລ້ວ.
ເຈົ້າໜ້າທີ່ຕຳຫຼວດເປີດເຜີຍວ່າ: ນັບແຕ່ຕົ້ນປີເປັນຕົ້ນມາ, ຢູ່ຫຼາຍເມືອງແລະເຂດແຂວງໄດ້ເກີດຄະດີຫຼອກລວງທາງໂທລະຄົມຢ່າງຕໍ່ເນື່ອງເປັນຕົ້ນ ຫຼອກລວງໃຫ້ລົງທຶນໃນໂຄງການທີ່ບໍ່ມີຕົວຈິງ, ຫຼອກລວງໂດຍອ້າງເປັນເຈົ້າໜ້າທີ່ອົງການປ້ອງກັນຄວາມສະຫງົບ,ອົງການໄອຍະການແລະສານ. ຫຼັງສືບສວນສອບສວນໃນເບື້ອງຕົ້ນແລ້ວສາມາດຢັ້ງຢືນໄດ້ວ່າ ບ່ອນລີ້ຊ່ອນຂອງກຸ່ມກໍ່ອາຊະຍາກຳດັ່ງກ່າວຢູ່ໃນປະເທດກຳປູເຈຍ. ຈາກນີ້, ເດືອນກັນຍາຜ່ານມາ, ກະຊວງປ້ອງກັນຄວາມສະຫງົບຈີນໄດ້ສົ່ງໜ່ວຍງານທີ່ປະກອບດ້ວຍເຈົ້າໜ້າທີ່ຕຳຫຼວດຈາກແຂວງຊ່ານຕຸ່ງ, ແຂວງເຫີນານ, ແຂວງກວາງຕຸ້ງ, ນະຄອນຈຸ່ງກິ່ງແລະອື່ນໆເດີນທາງໄປກຳປູເຈຍ.
ມາເຖິງວັນທີ 17 ຕຸລານີ້, ເຈົ້າໜ້າທີ່ຕຳຫຼວດກຳປູເຈຍໄດ້ເຈາະຈົງປະຕິບັດການຈັບກຸມຜູ້ຖືກສົງໄສກໍ່ອາຊະຍາກຳຢູ່ບ່ອນລີ້ຊ່ອນ 4 ບ່ອນທີ່ນະຄອນຫຼວງພະນົມເປັນແລະອື່ນໆໂດຍສາມາດຈັບຜູ້ຖືກສົງໄສ 61 ຄົນ ໃນນີ້ ຊາວແຜ່ນດິນໃຫຍ່ຈີນ 42 ຄົນ, ຊາວຈີນໄຕ້ຫວັນ 19 ຄົນ ທັງຢຶດເຄື່ອງມືກະທຳຜິດກົດໝາຍເປັນຈຳນວນຫຼາຍເປັນຕົ້ນມືຖື, ຄອມພິວເຕີ, ບັດທະນາຄານແລະອື່ນໆ. ຫຼັງໄດ້ແລກປ່ຽນຄວາມເຫັນແລະທຳຄວາມເຂົ້າໃຈກັນ, ເຈົ້າໜ້າທີ່ກຳປູເຈຍໄດ້ມອບຜູ້ຖືກສົງໄສ 61 ຄົນດັ່ງກ່າວໃຫ້ເຈົ້າໜ້າທີ່ຈີນເພື່ອນຳໄປດຳເນີນຄະດີຕາມກົດໝາຍ.