ວັນທີ 30 ຕຸລານີ້, ທ່ານ ໂມຮຳມັດ ໂຮສ໌ເຊັນ ບາເຄຣີ ຫົວໜ້າກົມໃຫຍ່ເສນາທິການກອງກຳລັງປະກອບອາວຸດອີຣານກ່າວວ່າ: ຖ້າອາເມລິກາໃຊ້ມາດຕະການຂວ້ຳບາດປະເທດຕົນຄືນໃໝ່ ກໍຈະຖອນອອກຈາກສັນຍາວ່າດ້ວຍອາວຸດນິວເຄລຍຂອງອີຣານແນ່ນອນ.
ໜັງສືພິມເຕເຮຣານທ້າມສ໌ຂອງອີຣານລາຍງານໂດຍອ້າງຕາມການເປີດເຜີຍຂອງທ່ານ ບາເຄຣີ ໃນຂະນະທີ່ເຂົ້າຮ່ວມກອງປະຊຸມຝ່າຍທະຫານໃນມື້ດັ່ງກ່າວວ່າ: ການທີ່ອີຣານເຊັນສັນຍາກໍເພື່ອໃຫ້ຝ່າຍຕາເວັນຕົກຍົກເລີກການຂວ້ຳບາດ,ແຕ່ຖ້າຟື້ນຟູການຂວ້ຳບາດຄືນໃໝ່,ສັນຍາດັ່ງກ່າວກໍຈະບໍ່ມີຄວາມໝາຍຫຍັງສຳລັບອີຣານ.
ທ່ານ ບາເຄຣີ ເນັ້ນວ່າ: ອີຣານໃຫ້ຄຳໝັ້ນສັນຍາມາໂດຍຕະຫຼອດວ່າຈະປະຕິບັດຕາມເນື້ອໃນສັນຍາດັ່ງກ່າວ, ແຕ່ຖ້າອາເມລິກາຟື້ນຟູການຂວ້ຳບາດ ຄືນໃໝ່ໂດຍຊອກຂໍ້ອ້າງທຸກສິ່ງ ກໍຈະຖອນອອກຈາກສັນຍາວ່າດ້ວຍອາວຸດນິວເຄລຍຂອງອີຣານຢ່າງແນ່ນອນ.
ທັງນີ້ໃນວັນທີ 13 ຕຸລານີ້, ທ່ານ ໂດນັນ ທຣຳ ປະທານາທິບໍດີອາເມລິກາໄດ້ປາໄສ ເຊິ່ງບໍ່ພຽງແຕ່ປະຕິເສດການຢືນຢັນໃນການປະຕິບັດຕາມຄຳໝັ້ນສັນຍາຂອງອີຣານເທົ່ານັ້ນ,ແຕ່ຍັງໄດ້ປະກາດຈະຂວ້ຳບາດກອງປ້ອງກັນປະຕິວັດອິສລາມຂອງອີຣານອີກດ້ວຍ.