ທ່ານຫຼີເຄີ້ສຽງ ນາຍົກລັດຖະມົນຕີຈີນແລະທ່ານເມັດເວເດັຟ ນາຍົກລັດຖະມົນຕີຣັດເຊຍໄດ້ຖະແຫຼງຂ່າວຮ່ວມຕໍ່ສື່ມວນຊົນຫຼັງການພົບປະເປັນປະຈຳເທື່ອທີ 22 ລະຫວ່າງນາຍົກຈີນ-ຣັດເຊຍຢູ່ຫໍສະພາປະຊາຊົນແຫ່ງຊາດນະຄອນຫຼວງປັກກິ່ງໃນຕອນເຊົ້າວັນທີ 1 ພະຈິກນີ້.
ທ່ານຫຼີເຄີ້ສຽງໄດ້ແຈ້ງຜົນຂອງການພົບປະເທື່ອນີ້ໂດຍເນັ້ນວ່າ ຈີນຍິນດີສືບຕໍ່ສົ່ງເສີມສາຍພົວພັນຈີນ-ຣັດເຊຍແລະການຮ່ວມມືໃນບັນດາຂົງເຂດບົນພື້ນຖານການເຄົາລົບເຊິ່ງກັນແລະກັນ, ສະເໝີພາບ,ຕ່າງຝ່າຍຕ່າງມີຜົນປະໂຫຍດແລະພັດທະນາຮ່ວມກັນ, ຊຸກຍູ້ການສ້າງສາຍພົວພັນສາກົນແບບໃໝ່ທີ່ເອົາການຮ່ວມມືແບບຕ່າງຝ່າຍຕ່າງມີຜົນປະໂຫຍດເປັນໃຈກາງເພື່ອສ້າງຄວາມສົມບູນພູນສຸກໃຫ້ແກ່ປະຊາຊົນສອງຊາດກໍຄືປົກປັກຮັກສາສັນຕິພາບແລະສະຖຽນລະພາບຂອງໂລກ.
ທ່ານເມັດເວເດັຟຢືນຢັນວ່າ ຣັດເຊຍ ພໍໃຈຕໍ່ຜົນສຳເລັດທີ່ພົ້ນເດັ່ນຂອງການພົບປະເປັນປະຈຳລະຫວ່າງນາຍົກລັດຖະມົນຕີສອງປະເທດພ້ອມດ້ວຍກົນໄກຮ່ວມມືທີ່ກ່ຽວຂ້ອງ ແລະຫວັງວ່າສອງຝ່າຍຈະສືບຕໍ່ຍຶດໝັ້ນເຈດຈຳນົງແຫ່ງການຮ່ວມມືຢ່າງຕັ້ງໜ້າແລະທ່າທີສ້າງສັນເພື່ອຈັດຕັ້ງປະຕິບັດໂຄງການຮ່ວມມືສຳຄັນທີ່ມີຢູ່ແລ້ວ, ຕັ້ງໜ້າຄົ້ນຄວ້າຂົງເຂດການຮ່ວມມືໃໝ່ແລະເປີດກວ້າງການຄ້າສອງຝ່າຍຕື່ມອີກ; ເພີ່ມທະວີການແລກປ່ຽນດ້ານວັດທະນະທຳແລະການສຶກສາ, ຈັດກິດຈະກຳປີແລກປ່ຽນໃນຫົວຂໍ້ຕ່າງໆໃຫ້ຫຼາຍກວ່າເກົ່າເພື່ອເພີ່ມທະວີມິດຕະພາບລະຫວ່າງປະຊາຊົນສອງຊາດແລະລົງເລິກການຮ່ວມມືດ້ານການທະນາຄານ,ຮ່ວມກັນຊຸກຍູ້ເສດຖະກິດໂລກໃຫ້ພັດທະນາທີ່ກ້ຳເກິ່ງແລະປອດໃສ.
 |
