ສື່ມວນຊົນເຢແມນ ລາຍງານວ່າ: ກອງກຳລັງຮ່ວມຫຼາຍປະເທດ ທີ່ນຳພາໂດຍຊາອຸດິ ອາຣາເບຍ ໄດ້ໂຈມຕີແຂວງຊາດາ ທາງພາກເໜືອເຢແມນທາງອາກາດ ໃນຕອນຮຸ່ງເຊົ້າວັນທີ 1 ພະຈິກນີ້ ສົ່ງຜົນເຮັດໃຫ້ຢ່າງໜ້ອຍມີປະຊາຊົນ 26 ຄົນເສຍຊີວິດ ແລະບາດເຈັບອີກຫຼາຍສິບຄົນ.
ນັບແຕ່ປີ 2015 ເປັນຕົ້ນມາ, ກອງກຳລັງຮ່ວມຫຼາຍປະເທດ ທີ່ນຳພາໂດຍຊາອຸດິ ອາຣາເບຍ ໄດ້ໂຈມຕີເຢແມນທາງອາກາດ ແລະ ສົ່ງຜົນເຮັດໃຫ້ຊາວທ້ອງຖິ່ນເສຍຊີວິດນັ້ນ ໄດ້ເກີດຂຶ້ນເລື້ອຍໆ ດັ່ງເມື່ອວັນທີ 18 ຕຸລາຜ່ານມາ, ໄດ້ໂຈມຕີແຂວງອານໂຈຟ ທາງພາກຕາເວັນອອກສຽງເໜືອເຢແມນ ເຮັດໃຫ້ຄອບຄົວໜຶ່ງມີ 6 ຄົນເສຍຊີວິດ ໃນນີ້ມີແມ່ຍິງແລະເດັກນ້ອຍນຳດ້ວຍ.
ເມື່ອເດືອນກັນຍາປີ 2014, ກອງກຳລັງປະກອບອາວຸດຮູຊີ ປະເທດເຢແມນສາມາດຍຶດນະຄອນຫຼວງຊານາໄດ້ ແລະຈາກນັ້ນກໍຍຶດຄອງເຂດພາກໃຕ້ປະເທດດັ່ງກ່າວ ໂດຍບັງຄັບໃຫ້ທ່ານອັບດູ ຣັບບູ ມານຊົວ ຮາດີ ຈຳເປັນຕ້ອງໂຕນໜີໄປຊາອຸດິ ອາຣາເບຍ ເພື່ອລີ້ໄພ. ຕົກມາຮອດເດືອນມີນາປີ 2015, ຊາອຸດິ ອາຣາເບຍ ໄດ້ຮ່ວມກັບຫຼາຍປະເທດ ປະຕິບັດການທາງການທະຫານທີ່ມີຊື່ວ່າ "DSO ຫຼື the Decisive Storm Operation" ຕໍ່ກອງກຳລັງປະກອບອາວຸດຮູຊີ ສົ່ງຜົນເຮັດໃຫ້ສະຖານະການຢູ່ເຢແມນປັ່ນປ່ວນຢ່າງຕໍ່ເນື່ອງ. ຕໍ່ມາ, ພາຍຫຼັງໄດ້ຮັບການໄກ່ເກ່ຍຈາກອົງການສະຫະປະຊາຊາດ, ບັນດາຝ່າຍທີ່ປະທະກັນກໍໄດ້ເຈລະຈາສັນຕິພາບ ແຕ່ຈົນຮອດປັດຈຸບັນກໍບໍ່ສາມາດບັນລຸຂໍ້ຕົກລົງໃດໆທັງສິ້ນ.
