ຕາມຂ່າວCRI: ຕາມການລາຍງານວ່າ: ໃນຕອນບ່າຍວັນທີ 1 ພະຈິກນີ້, ທ່ານ ຊິນໂຈ ອາເບະ ຫົວໜ້າພັກເສລີປະຊາທິປະໄຕຍີ່ປຸ່ນໄດ້ຮັບຄະແນນສຽງຈາກສະພາຕ່ຳແລະສະພາສູງຍີ່ປຸ່ນເປັນຈຳນວນຫຼາຍ ໃຫ້ດຳລົງຕຳແໜ່ງນາຍົກລັດຖະມົນຕີແລະປະກອບຄະນະລັດຖະບານຊຸດໃໝ່.
ຕໍ່ເລື່ອງນີ້,ທ່ານນາງ ຮ້ວາຊຸ່ນຢີງ ໂຄສົກກະຊວງການຕ່າງປະເທດຈີນກ່າວໃນການຖະແຫຼງຂ່າວໃນວັນທີ 2 ພະຈິກນີ້ວ່າ: ການທີ່ສາຍພົວພັນລະຫວ່າງຈີນ-ຍີ່ປຸ່ນພັດທະນາຢ່າງໝັ້ນທ່ຽງແລະປອດໃສນັ້ນ ສອດຄ່ອງກັບຜົນປະໂຫຍດໂດຍພື້ນຖານຂອງສອງປະເທດກໍຄືປະຊາຊົນສອງປະເທດ. ຈີນມີຈຸດຢືນມາໂດຍຕະຫຼອດວ່າຄວນຂະຫຍາຍສາຍພົວພັນລະຫວ່າງສອງປະເທດບົນພື້ນຖານເອກະສານການເມືອງ 4 ສະບັບແລະຄວາມເປັນເອກະພາບດ້ານຫຼັກການ 4 ປະການລະຫວ່າງສອງປະເທດ ແລະຈິດໃຈຖອດຖອນບົດຮຽນທາງປະຫວັດສາດ ແລະອວ່າຍໜ້າໄປສູ່ອະນາຄົດ. ຈາກນີ້ຈຶ່ງຫວັງວ່າລັດຖະບານຍີ່ປຸ່ນຊຸດໃໝ່ຈະເຄົາລົບແລະປະຕິບັດຕາມເອກະສານທີ່ກ່ຽວຂ້ອງແລະຈິດໃຈແຫ່ງຄວາມເປັນເອກະພາບ,ປະຕິບັດນະໂຍບາຍຕໍ່ຈີນຢ່າງຕັ້ງໜ້າ,ປັບປຸງສາຍພົວພັນລະຫວ່າງສອງປະເທດດ້ວຍການກະທຳຕົວຈິງ ແລະຮ່ວມກັບຈີນພະຍາຍາມຊຸກຍູ້ສາຍພົວພັນລະຫວ່າງສອງປະເທດໃຫ້ຂະຫຍາຍຕົວໄປໜ້າແລະປັບປຸງໃຫ້ດີຂຶ້ນຕາມທິດທີ່ຖືກຕ້ອງ.
 |
