ວັນທີ 3 ພະຈິກນີ້, ທ່ານຟາຕູ ເບັນຊູດາ, ເຈົ້າໜ້າທີ່ໄອຍະການຂອງສານອາຍາສາກົນຖະແຫຼງວ່າ, ໄດ້ຮຽກຮ້ອງໃຫ້ດຳເນີນການສືບສວນອາຊະຍາກຳສົງຄາມທີ່ອາດຈະເກີດຂຶ້ນໃນການປະທະກັນດ້ວຍກຳລັງອາວຸດຢູ່ອັຟການີສະຖານ, ສານກ່ອນການພິຈາລະນາຂອງສານດັ່ງກ່າວຈະຕົກລົງວ່າຈະມອບສິດຫຼືບໍ່.
ທັງນີ້ທ່ານເບັນຊູດາໄດ້ກ່າວໃນຖະແຫຼງການສະບັບໜຶ່ງວ່າ: "ໂດຍຜ່ານການຄົ້ນຄວ້າເບື້ອງຕົ້ນຕໍ່ສະພາບການທີ່ກ່ຽວຂ້ອງຢ່າງລະອຽດແລ້ວ, ໄດ້ຜົນສະຫຼຸບວ່າ, ການດຳເນີນການສືບສວນນັ້ນສອດຄ່ອງກັບເງື່ອນໄຂທັງໝົດທີ່ລະບຸໄວ້ໃນ 'ສົນທິສັນຍາໂຣມສານອາຍາສາກົນ'. ມີຫຼັກຖານອ້າງອີງສະແດງໃຫ້ເຫັນວ່າ, ເຄີຍມີການກະທຳທີ່ເປັນອາຊະຍາກຳສົງຄາມ ແລະກໍ່ໂທດກຳຕ້ານມວນມະນຸດເກີດຂຶ້ນໃນການປະທະກັນດ້ວຍກຳລັງອາວຸດຢູ່ອັຟການີສະຖານ." ແຕ່ໃນຖະແຫຼງການດັ່ງກ່າວບໍ່ໄດ້ກ່າວເຖິງກໍລະນີໃດ ແລະຜູ້ກະທຳຢ່າງລະອຽດ.
ທ່ານເບັນຊູດາກ່າວຕື່ມວ່າ, ຍ້ອນຂໍ້ຈຳກັດດ້ານສິດຄອບຄອງຂອງສານອາຍາສາກົນ, ການສືບສວນດັ່ງກ່າວຈະດຳເນີນໄປໂດຍແນໃສ່ການຮ້ອງຟ້ອງອາຊະຍາກຳສົງຄາມ ແລະໂທດກຳຕ້ານມວນມະນຸດທີ່ເກີດຂຶ້ນຢູ່ອັຟການີສະຖານຫຼັງວັນທີ 1 ພຶດສະພາປີ 2003, ແລະເກີດຂຶ້ນຢູ່ປະເທດພາຄີສົນທິສັນຍາໂຣມອື່ນໆຫຼັງວັນທີ 1 ກໍລະກົດປີ2002.