ຫ້ອງວ່າການຂ້າຫຼວງໃຫຍ່ວຽກງານສິດທິມະນຸດອົງການສະຫະປະຊາຊາດອອກຖະແຫຼງການໃນວັນທີ 3 ພະຈິກນີ້ຢູ່ເຊີແນວ ປະເທດສວິສໂດຍສະແດງຄວາມເປັນຫ່ວງຕໍ່ກໍລະນີທີ່ອົສຕຣາລີຕັດສິນປິດສູນຊາວອົບພະຍົບແຫ່ງໜຶ່ງໃນວັນທີ 31 ຕຸລາຜ່ານມາວ່າ, ມາດຕະການດັ່ງກ່າວຈະເຮັດໃຫ້ຊາວອົບພະຍົບ 600 ຄົນທີ່ຄ້າງຢູ່ສູນດັ່ງກ່າວຈະຕົກຢູ່ໃນພາວະສຸກເສີນທາງສິດທິມະນຸດ.
ຖະແຫຼງການລະບຸວ່າ: ພວກຂ້າພະເຈົ້າຂໍເຕືອນໃຫ້ລັດຖະບານອົສຕຣາລີແລະປາປົວນິວກີເນຄວນປະຕິບັດຕາມພັນທະທີ່ກຳນົດໄວ້ໃນກົດໝາຍສາກົນວ່າດ້ວຍສິດທິມະນຸດ, ເຄົາລົບສົນທິສັນຍາຊາວອົບພະຍົບສະບັບປີ 1951, ປົກປ້ອງຊາວອົບພະຍົບໃຫ້ປາສະຈາກການທຳຮາຍ,ຮັບປະກັນໃຫ້ເຂົາເຈົ້າມີສິດສະແຫວງຫາແລະໄດ້ຮັບການປົກປ້ອງ ແລະຮັບປະກັນໃຫ້ເຂົາເຈົ້າມີສິດພື້ນຖານທາງເສດຖະກິດ,ສັງຄົມແລະວັດທະນະທຳ ລວມທັງເຮືອນຢູ່,ນ້ຳສະອາດ, ອາຫານ,ສາທາລະນະສຸກແລະການບໍລິການຮັກສາສຸຂະພາບອັນຄວນ.
ຖະແຫຼງການຍັງເລັ່ງໃຫ້ລັດຖະບານອົສຕຣາລີແລະປາປົວນິວກີເນເຈລະຈາກັບຊາວອົບພະຍົບເພື່ອຮັບປະກັນໃຫ້ສິດຂອງເຂົາເຈົ້າໄດ້ຮັບຄວາມເຄົາລົບນັບຖື,ການປົກປ້ອງແລະການປະຕິບັດຢ່າງເໝາະສົມ.
 |
