ອົງການສະຫະປະຊາຊາດກ່າວວ່າ ຢູ່ຊູດັງໃຕ້ ຫຼາຍກວ່າ6ລ້ານຄົນຜະເຊີນກັບໄພຂົ່ມຂູ່ຈາກເຄື່ອງລະເບີດຕ່າງໆ

ວັນທີ 4 ພະຈິກນີ້, ສຳນັກງານກູ້ລະເບີດຂອງອົງການສະຫະປະຊາຊາດໄດ້ອອກຖະແຫຼງການໂດຍກ່າວວ່າ, ຢູ່ຊູດັງໃຕ້ມີ ຫຼາຍວ່າ 6 ລ້ານຄົນດຳລົງຊີວິດຢູ່ເຂດທີ່ຜະເຊີນກັບໄພຂົ່ມຂູ່ຈາກໝາກມິນ ແລະເຄື່ອງລະເບີດອື່ນໆທີ່ຕົກຄ້າງໄວ້ຈາກສະໄໝສົງຄາມ.

ໃນຖະແຫຼງການດັ່ງກ່າວຂຽນວ່າ, ຢູ່ຊູດັງໃຕ້ໄດ້ຄົ້ນພົບເຄື່ອງລະເບີດຕ່າງໆປະມານ 150 ໜ່ວຍສະເລ່ຍຕໍ່ເດືອນ, ເຊິ່ງເຄື່ອງລະເບີດເຫຼົ່ານີ້ບໍ່ພຽງແຕ່ເປັນອຸປະສັກກີດຂວາງສາມັນຊົນໜີອອກຈາກເຂດທີ່ເກີດການປະທະກັນເລື້ອຍໆເທົ່ານັ້ນ, ຍັງໄດ້ສ້າງຄວາມຫຍຸ້ງຍາກໃຫ້ແກ່ການຊ່ວຍເຫຼືອດ້ານມະນຸດສະທຳ, ແລະສະກັດກັ້ນການພັດທະນາເສດຖະກິດສັງຄົມຂອງຊູດັງໃຕ້.

ໃນຖະແຫຼງການຍັງຂຽນວ່າ, ສຳນັກງານກູ້ລະເບີດອົງການສະຫະປະຊາຊາດໄດ້ດຳເນີນການຄົ້ນຫາ ແລະລົບລ້າງເຄື່ອງລະເບີດທີ່ຕົກຄ້າງຈາກສົງຄາມຢູ່ຊູດັງໃຕ້, ເຊິ່ງໄດ້ຮັບປະກັນຄວາມປອດໄພຂອງເຈົ້າໜ້າທີ່ຮັກສາສັນຕິພາບ, ແລະໄດ້ສ້າງເງື່ອນໄຂອຳນວຍໃຫ້ອົງການຈັດຕັ້ງມະນຸດສະທຳດຳເນີນການຊ່ວຍເຫຼືອ, ແລະເຮັດໃຫ້ປະຊາຊົນຊູດັງໃຕ້ຟື້ນຟູຊີວິດການເປັນຢູ່ໃຫ້ກັບຄືນສູ່ສະພາບປົກກະຕິ.