ວັນທີ 5 ພະຈິກນີ້, ທ່ານກິມຮານຈີ ຜູ້ວ່າການສະຖາບັນຄົ້ນຄວ້າວັກແຊັງສາກົນໃຫ້ສຳພາດຕໍ່ສື່ມວນຊົນວ່າ, ການພັດທະນາວັກແຊັງເປັນແຜນກຸ້ມຄ່າໃນການຍົກລະດັບສຸຂະພາບຂອງຊາວໂລກ, ທັງຮຽກຮ້ອງໃຫ້ປະຊາຄົມໂລກ ແລະວິສາຫະກິດຜະລິດຢາຮ່ວມມືຜະລິດວັກແຊັງທີ່ປອດໄພ ແລະມີລາຄາເໝາະສົມໃຫ້ແກ່ຊາວໂລກເພື່ອຕໍ່ຕ້ານກັບພະຍາດແຜ່ລະບາດ.
ໂຄງການສະຫະປະຊາຊາດເພື່ອການພັດທະນາໄດ້ສ້າງສະຖາບັນຄົ້ນຄວ້າວັກແຊັງສາກົນຢູ່ນະຄອນຫຼວງເຊອຸນຂອງສ.ເກົາຫຼີໃນປີ 1997, ເຊິ່ງເປັນສະຖາບັນຄົ້ນຄວ້າສາກົນພຽງແຫ່ງດຽວໃນໂລກທີ່ຄົ້ນຄວ້າຜະລິດວັກແຊັງລາຄາຖືກໃຫ້ແກ່ຜູ້ທຸກຍາກ. ເນື່ອງໃນໂອກາດຂອງວັນສ້າງຕັ້ງສະຖາບັນດັ່ງກ່າວຄົບຮອບ 20 ປີ, ທ່ານກິມຮານຈີກ່າວວ່າ, ແນ່ນອນແລ້ວ ການໃຊ້ຢາປົວພະຍາດເປັນແຜນການຊະນິດໜຶ່ງທີ່ສາມາດຍົກລະດັບສຸຂະພາບຂອງຊາວໂລກ, ແຕ່ການໃຊ້ຢາວັກແຊງເປັນແຜນທີ່ກຸ້ມຄ່າຫຼາຍກວ່າ.
ທ່ານກ່າວຕື່ມວ່າ, ແຕ່ລະປີ ຢາວັກແຊັງສາມາດຊ່ວຍປ້ອງກັນການເສຍຊີວິດຂອງ 2 ລ້ານ ຫາ 3ລ້ານຄົນ, ແຕ່ການຄົ້ນຄວ້າວັກແຊັງຊະນິດໜຶ່ງຕ້ອງການລົງທຶນ ແລະ ແຮງງານຢ່າງສືບເນື່ອງພາຍໃນ 10 ປີເປັນຢ່າງໜ້ອຍ, ສະນັ້ນ ບໍລິສັດໃຫຍ່ດ້ານການຜະລິດຢາເປັນກຳລັງຫຼັກແຫຼ່ງໃນການຄົ້ນຄວ້າຜະລິດວັກແຊັງ.
ທ່ານເຫັນວ່າ, ຕ້ອງໃຫ້ຄວາມສຳຄັນຕໍ່ການຄົ້ນຄວ້າວັກແຊັງຕ້ານພະຍາດທີ່ປາກົດຕົວຂຶ້ນໃໝ່. ຜູ້ນຳຂອງຫຼາຍປະເທດຄິດວ່າ, ພະຍາດບາງຊະນິດຈະບໍ່ກະທົບເຖິງພົນລະເມືອງພາຍໃນປະເທດຕົນຈຶ່ງບໍ່ໄດ້ສົນໃຈຕໍ່ພະຍາດເຫຼົ່ານີ້, ແຕ່ໃນຄວາມເປັນຈິງແລ້ວ, "ລະຫວ່າງເຊື້ອພະຍາດກັບພວກເຮົາມີແຕ່ເຮືອບິນລຳດຽວເທົ່ານັ້ນ."