ຕອນຄ່ຳວັນທີ 5 ພະຈິກນີ້, ກອງທະຫານນາໆຊາດທີ່ນຳໂດຍອາຣັບບີຊາອຸດິດ ປະກາດວ່າ, ເພື່ອສະກັດກັ້ນບໍ່ໃຫ້ອີຣານຂົນສົ່ງອາວຸດຍຸດໂທປະກອນເຊັ່ນຂີປະນາວຸດເປັນຕົ້ນໃຫ້ກຸ່ມປະກອບອາວຸດຮູຊີເຢແມນ ຈະປິດເສັ້ນທາງສູ່ພາຍນອກທາງບົກ, ທາງທະເລ ແລະທາງອາກາດຂອງເຢແມນ.
ສຳນັກຂ່າວສານແຫ່ງຊາດເຢແມນ ໄດ້ອ້າງຕາມຖະແຫຼງການສະບັບໜຶ່ງຂອງກອງທະຫານນາໆຊາດໂດຍລາຍງານວ່າ, ຫຼັງພິສູດຊາກຂີປະນາວຸດທີ່ກຸ່ມປະກອບອາວຸດຮູຊີຍິງໄປສູ່ທິດສະໜາມບິນສາກົນລີອັດນະຄອນຫຼວງຊາອຸດິອາຣັບບີແລ້ວຢືນຢັນວ່າ, ຂີປະນາວຸດດັ່ງກ່າວຜະລິດໂດຍອີຣານ. ຂະນະດຽວກັນ, ຂີປະນາວຸດທີ່ກຸ່ມປະກອບອາວຸດຮູຊີຍິງໄປສູ່ທິດໄມກາໃນວັນທີ 27 ກໍລະກົດຜ່ານມານັ້ນ ກໍໄດ້ຮັບການຢືນຢັນວ່າຜະລິດໂດຍອີຣານເຊັ່ນດຽວກັນ.
ຖະແຫຼງການດັ່ງກ່າວໄດ້ເຕືອນປະຊາຊົນ, ເຈົ້າໜ້າທີ່ຊ່ວຍເຫຼືອ ແລະ ການທູດທີ່ຢູ່ເຢແມນ ບໍ່ຄວນໄປເຂດສູ້ຮົບແລະເຂດເຕົ້າໂຮມຂອງກຸ່ມປະກອບອາວຸດຮູຊີ.