ຕຳ​ຫຼວດ​ທະ​ເລ​ຈີນ-​ຟີ​ລິບ​ປິນ​​ພົບ​ປະ​​ຄັ້ງ​ທຳ​ອິດ, ເພື່ອຮ່ວມ​ກັນ​ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳຄວາມ​ປອດ​ໄພ​ທາງ​ທະ​ເລ
2017-11-08 17:43:21  cri 
​ ​ເພື່ອ​ປະ​ຕິ​ບັດຕາມ "ບົດ​ບັນ​ທຶກ​ຄວາມ​ເຂົ້າ​ໃຈ​ກ່ຽວ​ກັບ​ການ​ສ້າງ​ຕັ້ງ​ຄະ​ນະ​ກຳ​ມະ​ການ​ຮ່ວມ​ມື​ປະ​ສົມ​ທາງ​ທະ​ເລ​ລະ​ຫວ່າງ​ກົມ​ຕຳ​ຫຼວດ​ທະ​ເລ​ຈີນ​ແລະ​ກອງ​ປ້ອງ​ກັນ​ຝັ່ງ​ທະ​ເລ​ຟີ​ລິບ​ປິນ" ທີ່​ສອງ​ປະ​ເທດ​ລົງ​ນາມໂດຍ​ການ​ເປັນ​ສັກ​ຂີ​ພິ​ຍານ​ຂອງຜູ້​ນຳ​ສອງ​ປະ​ເທດ, ຕຳ​ຫຼວດ​ທະ​ເລ​ຈີນ​ແລະ​ຟີ​ລິບ​ປິນ​ໄດ້​ພົບ​ປະຫາ​ລື​ກັນ​ເປັນ​ຄັ້ງ​ທຳ​ອິດ​ຢູ່​ນະ​ຄອນ​ຫຼວງ​ປັກ​ກິ່ງ​ປະ​ເທດ​ຈີນ​ໃນ​ວັນ​ທີ 7 ພະ​ຈິກ​ນີ້. ​ໂດຍສອງ​ຝ່າຍ​ໄດ້​ແລກ​ປ່ຽນ​ຄວາມ​ເຫັນ​ຢ່າງ​ເລິກ​ເຊິ່ງ​ກ່ຽວ​ກັບ​ການ​ຮ່ວມ​ມື​ລະ​ຫວ່າງ​ຕຳ​ຫຼວດ​ທະ​ເລ​​ສອງ​ປະ​ເທດ​ແລະ​ບັນ​ຫາ​ທີ່​ສອງ​ຝ່າຍ​ສົນ​ໃຈ​ຮ່ວມ, ແລະ​ໄດ້​ກ້າວ​ໄປ​ສູ່​ຄວາມ​ເປັນ​ເອ​ກະ​ພາບ​ສຳ​ຄັນ.

ສອງ​ຝ່າຍ​ເຫັນ​ວ່າ, ການ​ຮ່ວມ​ມື​​ເພື່ອຄວາມ​ປອດ​ໄພ​ດ້ານ​ການ​ປະ​ຕິ​ບັດ​ກົດ​ໝາຍ​ທາງ​ທະ​ເລ​ແມ່ນ​​ການ​ປະ​ກອບສ່ວນ​ສຳ​ຄັນ​ຂອງ​ການ​ພົວ​ພັນ​ລະ​ຫວ່າງ​ຈີນ​ກັບ​ຟີ​ລິບ​ປິນ, ເຊິ່ງຕຳ​ຫຼວດ​ທະ​ເລ​ສອງ​ປະ​ເທດ​ໄດ້​ເສີມ​ຂະ​ຫຍາຍ​ການ​ພົວ​ພັນ​ຮ່ວມ​ມື​ມິດ​ຕະ​ພາບ, ​ທັງ​ເປັນ​ຜົນ​ດີ​ຕໍ່​ການ​ຮັກ​ສາ​ຄວາມ​ປອດ​ໄພ​ແລະ​ລະ​ບຽບ​ການ​ທາງ​ທະ​ເລ​ຂອງ​ພາກ​ພື້ນ, ​ແລະສອດ​ຄ່ອງ​ກັບ​ຜົນ​ປະ​ໂຫຍດ​ພື້ນ​ຖານ​ຂອງ​ລັດ​ແລະ​ປະ​ຊາ​ຊົນ​ສອງ​ປະ​ເທດ. ສອງ​ຝ່າຍ​ຕົກ​ລົງ​ຈະ​ຈັດ​ກອ​ງ​ປະ​ຊຸມ​ຄະ​ນະ​ກຳ​ມະ​ການ​ຮ່ວມ​ມື​ປະ​ສົມ​ລະ​ຫວ່າງ​ຕຳ​ຫຼວດ​ທະ​ເລ​ສອງ​ປະ​ເທດຄັ້ງ​ທີ​ສອງ​ຢູ່​ເມືອງກວາງ​ໂຈ່ວ​ແຂວງກວາງ​ຕຸ້ງ ສ​ປ ຈີນ​ໃນ 6 ເດືອນ​ຕົ້ນ​ປີ​ໜ້າ.

ສອງ​ຝ່າຍ​ໄດ້​ສະ​ແດງ​ຄວາມ​ພໍ​ໃຈ​ຕໍ່​ໂຄງ​ການ​ຮ່ວມ​ມື​ທີ່​ໄດ້​ປະ​ຕິ​ບັດ​ໃນ​ປັດ​ຈຸ​ບັນ, ​ແລະ​ຕໍ່​ໜ້າ​ຈະ​​ຖື​ເອົາ​​ຂົງ​ເຂດການ​ຕໍ່​ຕ້ານ​ອາ​ຊະ​ຍະ​ກຳ​ຂ້າມ​ຊາດ​ທາງ​ທະ​ເລ, ​ການຄ້າ​ຂາຍ​ຢາ​ເສບ​ຕິດ​ທາງ​ທະ​ເລ, ຊ່ວຍກອບ​ກູ້​ທາງ​ທະ​ເລ​ແລະ​ການ​ຊ່ວຍ​ເຫຼືອ​ມະ​ນຸດ​ສະ​ທຳ​ເປັນ​ຈຸດ​​ສຳ​ຄັນ​ໃນ​ການ​ຮ່ວມ​ມື, ​ນອກ​ນີ້ສອງ​ຝ່າຍ​ຍັງ​ໄດ້​ເຫັນ​ດີ​ເພີ່ມ​ທະ​ວີ​ການ​ແລກ​ປ່ຽນ​ລະ​ຫວ່າງ​ບຸກ​ຄະ​ລາ​ກອນ, ແລະ​ຈະ​ຈັດ​ການ​ຢ້ຽມ​ຢາມ​ເຊິ່ງ​ກັນ​ແລະ​ກັນ​ທາງ​ກຳ​ປັ່ນ​ແລະ​ຊ້ອມ​ຮົບ​ຮ່ວມ​ໃນ 6 ເດືອນ​ຕົ້ນ​ປີ​ໜ້າ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ