ນາ​ຍົກ​ຈີນ-ເຢຍ​ລະ​ມັນ​ລົມ​ໂທ​ລະ​ສັບ
2017-11-08 16:08:41  cri 
    ຕອນ​ບ່າຍ​ວັນ​ທີ 7 ພະ​ຈິກນີ້, ທ່ານ ຫຼີ​ເຄີ້​ສຽງ ນາ​ຍົກ​ລັດ​ຖະ​ມົນ​ຕີ​ຈີນ ໄດ້​ຮັບ​ໂທ​ລະ​ສັບ​ຈາກ​ທ່ານ​ນາງ ອັນ​ເຈີ​ລາ ເມີ​ແຄວ ນາ​ຍົກ​ລັດ​ຖະ​ມົນ​ຕີ​ເຢຍ​ລະ​ມັນ.

    ໂອ​ກາດ​ດັ່ງ​ກ່າວ, ນາ​ຍົກ​ສອງ​ທ່ານ ໄດ້​ຕີ​ລາ​ຄາ​ສູງ​ຕໍ່​ຄວາມ​ຄືບ​ໜ້າ​ໃໝ່​ຂອງ​ການ​ພົວ​ພັນ​ແລະ​ການ​ຮ່ວມ​ມື​ລະ​ຫວ່າງ​ສອງ​ປະ​ເທດ​ໃນ​ໜຶ່ງ​ປີ​ຜ່ານ​ມາ.

    ທ່ານ ຫຼີ​ເຄີ້​ສຽງ ກ່າວ​ວ່າ, ຈີນ​ຍິນ​ດີ​ຕ້ອນ​ຮັບ​ວິ​ສາ​ຫະ​ກິດ​ປະ​ເທດ​ຕ່າງໆ​ລວມ​ທັງ​ເຢຍ​ລະ​ມັນ​ເຂົ້າ​ມາລົງ​ທຶນ​ຢູ່​ຈີນ, ດຳ​ເນີນ​ການ​ຮ່ວມ​ມື​ດ້ານ​ເຕັກ​ນິກ ແລະ ຄວາມ​ຮູ້. ພວກ​ເຮົາ​ຍິນ​ດີ​ສ້າງສະ​ພາບ​ແວດ​ລ້ອມ​ການ​ທຸ​ລະ​ກິດ​ທີ່​ສະ​ເໝີ​ພາ​ບ​ກັນ ແລະ​ມີ​ການ​ແກ້ງ​ແຍ້ງ​ຢ່າງ​ຍຸ​ຕິ​ທຳ​ໃຫ້​ແກ່​ວິ​ສາ​ຫະ​ກິດ​ຈີນ​ແລະ​ຕ່າງ​ປະ​ເທດ, ​ສ້າງເງື່ອນ​ໄຂ​ທີ່​ດີ​ໃນ​ການ​ເປີດກວ້າງ​ທຸ​ລະ​ກິດ ແລະ ດຳ​ເນີນ​ການ​ຮ່ວມ​ມື​ແບບ​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດ​ຕາມ​ກົນ​ໄກຕະຫຼາດ.

    ທ່ານ​ນາງ ເມີ​ແຄວ ກ່າວ​ວ່າ, ເຢຍ​ລະ​ມັນ​ແລະ​ຈີນ ລ້ວນ​ແຕ່​ສຸມ​ໃສ່​ຊຸກ​ຍູ້​ການ​ພັດ​ທະ​ນາ​ການ​ພົວ​ພັນ​ສອງ​ຝ່າຍ. ປະ​ເທດ​ຕົນ ຍິນ​ດີ​ຮັກ​ສາ​ການ​ຢ້ຽມ​ຢາມ​ກັນ​ລະ​ຫວ່າງ​ການ​ນຳ​ຂັ້ນ​ສູງ​ກັບ​ຈີນ, ເພີ່​ມ​ທະ​ວີ​ການ​ຕິດ​ຕໍ່​ພົວ​ພັນ ແລະ ປະ​ສານ​ງານ, ເລີ່ມ​ດຳ​ເນີນ​ວຽກ​ງານ​ກະ​ກຽມ​ການ​ປຶກ​ສາ​ຫາ​ລື​ລະ​ຫວ່າງ​ລັດ​ຖະ​ບານ​ສອງ​ປະ​ເທດ​ຄັ້ງ​ໃໝ່​ໂດຍ​ໄວ, ລົງ​ເລິກ​ການ​ຮ່ວມ​ມື​ທາງ​ເສດ​ຖະ​ກິດ​ການ​ຄ້າ ແລະ ບັນ​ລຸ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ​ໂຫຍດ​ໃຫ້​ດີກວ່າ​ເກົ່າ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ