ກອງ​ປະ​ຊຸມ​ສຳ​ມະ​ນາ​ບັນ​ຫາ​ທະ​ເລ​ຈີນ​ໃຕ້ເນັ້ນ​ການ​ຮ່ວມ​ມື
2017-11-08 16:10:41  cri 
    ກອງ​ປະ​ຊຸມ​ສຳ​ມະ​ນາ​ສາ​ກົນ​ກ່ຽວ​ກັບການ​ຮ່ວມ​ມື​​ດ້ານຄວາມ​ໝັ້ນ​ຄົງຫຼາຍ​ຝ່າຍ​ຢູ່​ພາກ​ພື້ນ​ທະ​ເລ​ຈີນ​ໃຕ້​​ໃນ​ຫົວ​ຂໍ້​ "ເພີ່ມ​ທະ​ວີ​ການ​ຮ່ວມ​ມື​ຢູ່​ທະ​ເລ​ຈີນ​ໃຕ້: ມາດ​ຕະ​ການ​ໃໝ່​ໃນ​ການ​ປົກ​ປ້ອງ​ຄວາມ​ໝັ້ນ​ຄົງ​ທາງ​ທະ​ເລ" ໄດ້​ຈັດ​ຂຶ້ນ​ຢູ່​ນະ​ຄອນຫຼວງ​ປັກ​ກິ່​ງ​ໃນ​ວັນ​ທີ 7 ກັນ​ຍານີ້​ ໂດຍ​ມີ​ຜູ້​ຕາງ​ໜ້າ​ພາກ​ສ່ວນຕ່າງໆ, ຜູ້​ຮັບ​ຜິດ​ຊອບ​ຄັງ​ສຳ​ຮອງ​ຫົວ​ກະ​ທິ​ທີ່​ມີ​ຊື່​ສຽງ, ຜູ້​ຊ່ຽວ​ຊານ ແລະ ນັກ​ວິ​ຊາ​ການປະ​ມານ 80 ທ່ານ​ຈາກ​ຈີນ, ມາ​ເລ​ເຊຍ, ອິນ​ໂດ​ເນ​ເຊຍ, ກຳ​ປູ​ເຈຍ, ລາວ, ຟິ​ລິບ​ປິນ, ສິງ​ກະ​ໂປ, ຫວຽດ​ນາມ ແລະ​ປະ​ເທດ​ອື່ນໆ​ເຂົ້າ​ຮ່ວມ. ກອງ​ປະ​ຊຸມ​ດັ່ງ​ກ່າວ​ຈະ​ດຳ​ເນີນ​ເປັນ​ເວ​ລາ 2 ວັນ ໂດຍ​ສະ​ມາ​ຄົມ​ຍຸດ​ສາ​ດ​ສາ​ກົນ​ຈີນ ແລະ ສະ​ຖາ​ບັນ​ຄົ້ນ​ຄວ້າ​ວຽກ​ງານ​ທະ​ເລ​ມາ​ເລ​ເຊຍ ຮ່ວມ​ກັນ​ຈັດ​ຂຶ້ນນັ້ນ, ​ຜູ້​ຮ່ວມ​ປະ​ຊຸມ​ຈະ​ແລກ​ປ່ຽນ​ແລະ​ປະ​ກອບ​ຄຳ​ຄິດ​ຄຳ​ເຫັນ ກ່ຽວ​ກັບ​ການ​ເພີ່ມ​ທະ​ວີ​ການ​ຮ່ວມ​ມື​ຢູ່​ທະ​ເລ​ຈີນ​ໃຕ້.

    ທ່ານ ຈ້າວ​ນິງ ຮອ​ງ​ປະ​ທານ​ສະ​ມາ​ຄົມ​ຍຸດ​ທະ​ສາດ​ສາ​ກົນ​ຈີນ​ກ່າວ​ວ່າ, ປະ​ເທດ​ໃນ​ພາກ​ພື້ນ​ທະ​ເລ​ຈີນ​ໃຕ້ ລ້ວນ​ແຕ່​ມີ​ຜົນ​ປະ​ໂຫຍດ​ກ່ຽວ​ພັນ​ກັນ, ການ​ທີ່​ບັນ​ລຸ​ສັນ​ຕິ​ພາບ, ສະ​ຖຽນ​ລະ​ພາບ, ຄວາມ​ຈະ​ເລີນ​ຮຸ່ງ​ເຮືອງ ແລະ ການ​ພັດ​ທະ​ນາ​ຂອງ​ພາກ​ພື້ນ​ທະ​ເລ​ຈີນ​ໃຕ້​ນັ້ນ ແມ່ນ​ຄວາມ​ປາ​ຖະ​ໜາ​ຮ່ວມ ແລະ ໜ້າ​ທີ່​ຮ່ວມ​ກັນ​ຂອງ​ບັນ​ດາປະ​ເທດແຄມ​ຝັ່ງ ແລະ​ສອດ​ຄ່ອງ​ກັບ​ຜົນ​ປະ​ໂຫຍດ​ຮ່ວມ​ຂອງ​ທຸກ​ປະ​ເທດ​ແຄມ​ຝັ່ງ.

    ທ່ານ ອາ​ລົງ ເລ​ເນ​ນັດ ອາ​ຈານ​ຢູ່​ສູນ​ອາ​ຊີ​ມະ​ຫາ​ວິ​ທະ​ຍາ​ໄລ​ຟິ​ລິບ​ປິນ ມີ​ທ່າ​ທີ​ເຫັນ​ໄປ​ໃນ​ແງ່​ດີ​ແລະ​ຕິດ​ແທດ​ຕົວ​ຈິງ ຕໍ່​ການ​ຮ່ວມ​ມື​ຢູ່​ທະ​ເລ​ຈີນ​ໃຕ້. ແຕ່​ພ້ອມ​ກັນ​ນັ້ນ, ຍັງ​ຕ້ອງ​ຂ້າມ​ຜ່ານ​ອຸ​ປະ​ສັກຫຼາຍ​ປະ​ການ ເຊິ່ງ​ຝ່າຍ​ຕ່າງໆ​ຕ້ອງ​ເອົາ​ໃຈ​ໃສ່ ແລະສຸມ​ທ່າ​ແຮງ​ທາງ​ຊັບ​ພະ​ຍາ​ກອນ ເພື່ອ​ຊອກ​ຫາ​ວິ​ທີ​ແກ້​ໄຂ​ບັນ​ຫາ​ເຫຼົ່າ​ນີ້​ຮ່ວມ​ກັນ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ