ຕາມຂ່າວ CRI: ງານລ້ຽງສະເຫຼີມສະຫຼອງວັນສ້າງຕັ້ງສູນຈີນ-ອາຊຽນຄົບຮອບ 6 ປີໄດ້ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນໃນວັນທີ 7 ພະຈິກນີ້. ໂດຍທ່ານຂົງສວນຢິ້ວ ຜູ້ຊ່ວຍລັດຖະມົນຕີກະຊວງການຕ່າງປະເທດຈີນ, ທ່ານໂຈສ ຊັນເທຍໂກ ໂຮມັນນາ ເອກອັກຄະລັດຖະທູດຟີລິບປີນເຊິ່ງເປັນປະເທດປະທານໝູນວຽນອາຊຽນປະຈຳຈີນ, ທ່ານນາງຢາງຊິ້ວຜິງ ເລຂາທິການໃຫຍ່ສູນຈີນ-ອາຊຽນ, ທູຕານຸທູດແລະຜູ້ຕາງໜ້າຂອງບັນດາປະເທດອາຊຽນປະຈຳຈີນເຂົ້າຮ່ວມ.
ທ່ານຂົງສວນຢິ້ວ ຜູ້ຊ່ວຍລັດຖະມົນຕີກະຊວງການຕ່າງປະເທດຈີນກ່າວວ່າ, ຫຼາຍປີຜ່ານມາ, ສູນຈີນ-ອາຊຽນໄດ້ມີການພັດທະນາ, ເຊິ່ງເປັນການປະກອບສ່ວນສຳຄັນຊຸກຍູ້ສາຍພົວພັນລະຫວ່າງຈີນກັບອາຊຽນໃຫ້ຂະຫຍາຍຕົວເຂົ້າສູ່ລວງເລິກຢ່າງບໍ່ຢຸດຢັ້ງ. ຂະນະດຽວກັນ, ຈີນກໍສະໜັບສະໜູນວຽກງານຕ່າງໆຂອງສູນຈີນ-ອາຊຽນເໝືອນເດີມ.
ທ່ານໂຮມັນນາກ່າວວ່າ, 6 ປີຜ່ານມາ, ສູນຈີນ-ອາຊຽນໄດ້ປະກອບສ່ວນເພີ່ມຄວາມເຂົ້າໃຈລະຫວ່າງປະຊາຊົນຈີນແລະປະເທດອາຊຽນຢ່າງຕໍ່ເນື່ອງ, ລວມທັງຊຸກຍູ້ການພັດທະນາເສດຖະກິດການຄ້າແລະຫຼຸດຄວາມແຕກໂຕນໃນການພັດທະນາລະຫວ່າງປະເທດຕ່າງໆ.
ທ່ານນາງຢາງຊິ້ວຜິງ ກ່າວວ່າ, ສູນຈີນ-ອາຊຽນຈະສຸມທຸກຄວາມພະຍາຍາມຕື່ມອີກ, ເພື່ອປະກອບສ່ວນສ້າງອະນາຄົດອັນດີງາມລະຫວ່າງຈີນແລະອາຊຽນໃຫ້ຫຼາຍກວ່າເກົ່າ.
 |
