ຕອນບ່າຍວັນທີ 8 ພະຈິກນີ້, ທ່ານ ສີຈິ້ນຜິງ ປະທານປະເທດຈີນພ້ອມທ່ານນາງ ເພີງລີ້ຢວນ ພັນລະຍາ ໄດ້ເປັນເພື່ອນພາທາງທ່ານ ໂດນັນ ທຣຳ ປະນາທິບໍດີອາເມລິກາພ້ອມທ່ານນາງ ເມລາເນຍ ທຣຳ ພັນລະຍາ ທ່ຽວຊົມພະລາຊະວັງບູຮານ. ປະມຸກລັດສອງປະເທດພ້ອມພັນລະຍາ ທັງລົມກັນທັງດື່ມນ້ຳຊາຢູ່ຫໍປາວຢູ້ນຂອງພະລາຊະວັງບູຮານ ທັງໄດ້ທ່ຽວຊົມ 3 ຫໍໃຫຍ່ຢູ່ເບື້ອງໜ້າຂອງພະລາຊະວັງບູຮານ, ຊົມການສະແດງສີມືການສ້ອມແປງວັດຖຸບູຮານ, ງານວາງສະແດງວັດຖຸບູຮານທີ່ລ້ຳຄ່າ ແລະຊົມການສະແດງງິ້ວປັກກິ່ງ.
ທ່ານ ທຣຳ ໄດ້ສະແດງຄວາມຂອບໃຈຈີນທີ່ໄດ້ຈັດວາລະການຢ້ຽມຢາມຈີນຄັ້ງນີ້ຢ່າງຮອບຄອບ ທັງຊົມເຊີຍຜົນສຳເລັດກອງປະຊຸມໃຫຍ່ພັກກອມມູນິດຈີນຄັ້ງທີ 19 ຢ່າງສະຫງ່າງາມແລະທ່ານ ສີຈິ້ນຜິງ ໄດ້ຮັບເລືອກຕັ້ງເປັນເລຂາທິການໃຫຍ່ສູນກາງພັກກອມມູນິດຈີນອີກສະໄໝໜຶ່ງ, ທັງຊົມເຊີຍຜົນງານການພັດທະນາເສດຖະກິດຂອງຈີນທີ່ໄດ້ຮັບຢ່າງຫຼວງຫຼາຍ ແລະຫວັງວ່າ ການຢ້ຽມຢາມທາງລັດຖະກິດຄັ້ງນີ້ ຈະໄດ້ຮັບຜົນສຳເລັດ.
ໃນໄລຍະດັ່ງກ່າວ, ປະມຸກລັດສອງປະເທດ ຍັງໄດ້ແລກປ່ຽນຄວາມຄິດຄວາມເຫັນກ່ຽວກັບການປົກຄອງປະເທດ, ສາຍພົວພັນສອງປະເທດ ແລະບັນຫາຕ່າງໆທີ່ສອງຝ່າຍສົນໃຈຮ່ວມກັນ.