ວັນທີ 10 ພະຈິກນີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນໄດ້ເດີນທາງເຖິງຫວຽດນາມ, ເພື່ອເຂົ້າຮ່ວມກອງປະຊຸມບໍ່ເປັນທາງການຂອງຜູ້ນຳອົງການຮ່ວມມືເສດຖະກິດອາຊີປາຊີຟິກຫຼື ອາເປັກຄັ້ງທີ 25 ແລະຢ້ຽມຢາມຫວຽດນາມທາງລັດຖະກິດ. ໃນໂອກາດໃຫ້ສຳພາດຕໍ່ນັກຂ່າວ, ຜູ້ຊ່ຽວຊານຈີນແລະຫວຽດນາມລ້ວນແຕ່ເຫັນວ່າ, ການຢ້ຽມຢາມຄັ້ງນີ້ມີຄວາມໝາຍສຳຄັນຕໍ່ການເສີມຂະຫຍາຍສາຍພົວພັນລະຫວ່າງສອງປະເທດ.
ທ່ານໂດຕຽນຊິມ ອະດີດຫົວໜ້າສະຖາບັນຄົ້ນຄວ້າປະເທດຈີນຂອງສະຖາບັນວິທະຍາສາດສັງຄົມຫວຽດນາມກ່າວວ່າ, ການຢ້ຽມຢາມຄັ້ງທຳອິດຂອງທ່ານສີຈິ້ນຜິງຫຼັງກອງປະຊຸມໃຫຍ່ພັກກອມມູນິດຈີນຄັ້ງທີ 19 ໂດຍເລືອກຫວຽດນາມ, ນັ້ນສະແດງໃຫ້ເຫັນການໃຫ້ຄວາມສຳຄັນຂອງຈີນຕໍ່ຫວຽດນາມ, ກໍຄືສາຍພົວພັນລະຫວ່າງຫວຽດນາມ-ຈີນ. ໃນຖານະເປັນປະເທດໃກ້ຄຽງຂອງຈີນ, ຫວຽດນາມກໍຈະໄດ້ຮັບໂອກາດພັດທະນາທີ່ດີກວ່າເກົ່າຈາກການພັດທະນາຂອງຈີນ. ໃນຍຸກປັດຈຸບັນຍຸກຂອງການເກີດກະແສຕໍ່ຕ້ານໂລກາພິວັດແລະລັດທິປົກປ້ອງການຄ້າ, ການລົງເລິກຮ່ວມມືລະຫວ່າງຫວຽດນາມກັບຈີນແຮງເປັນສິ່ງທີ່ປະເສີດຫຼາຍ, ແລະຫວັງວ່າລັດຖະບານແລະປະຊາຊົນສອງປະເທດຈະແລກປ່ຽນແລະຮ່ວມມືທີ່ມີຄຸນນະພາບສູງ, ປະສິດທິພາບສູງແລະຕໍ່ເນື່ອງ.
ຫວ່າງມໍ່ໆມານີ້, ທ່ານຫວາງລິງກຸ້ຍ ຮອງຜູ້ອຳນວຍການປະຈຳການຂອງຄັງປັນຍາຍຸດທະສາດໂລກຂອງສະຖາບັນວິທະຍາສາດສັງຄົມຈີນກ່າວຢູ່ນະຄອນຫຼວງຮາໂນ້ຍ ສສ ຫວຽດນາມວ່າ, ການຢ້ຽມຢາມຄັ້ງນີ້ມີຜົນດີຕໍ່ການເຊື່ອມຈອດຍຸດທະສາດພັດທະນາແຫ່ງຊາດຂອງສອງປະເທດ, ຮ່ວມກັນຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ລົງເລິກສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດແລະໃຫ້ມີການຂະຫຍາຍຕົວໃໝ່. ສອງປະເທດຄວນເບິ່ງສາຍພົວພັນລະຫວ່າງສອງຝ່າຍໃນລະດັບສູງກວ່າເກົ່າແລະມີສາຍຕາທີ່ກວ້າງຂວາງກວ່າເກົ່າ, ໃນຂະບວນການຊຸກຍູ້ພັດທະນາພາລະກິດສັງຄົມນິຍົມທີ່ສອດຄ່ອງກັບສະພາບຂອງປະເທດຕົນ, ຮ່ຳຮຽນນຳກັນ, ເພື່ອເຮັດໃຫ້ສາຍພົວພັນລະຫວ່າງຈີນກັບຫວຽດນາມກາຍເປັນໂຕແບບຂອງການສ້າງສາຍພົວພັນສາກົນແບບໃໝ່ແລະສ້າງປະຊາຄົມຮ່ວມຊາຕາກຳມວນມະນຸດ.
 |
