ອາ​ຊຽນສະໜັບສະໜູນ​ຂະ​ບວນການ​ໂລກາ​ພິວັດ
2017-11-13 14:18:54  cri 

ກອງ​ປະຊຸມ​ສຸດ​ຍອດ​ອາ​ຊຽນຄັ້ງທີ 31 ​ແລະ​ກອງ​ປະຊຸມຕ່າງໆ ​ໄດ້​ຈັດ​ຂຶ້ນຢູ່​ນະຄອນຫຼວງມະນີ​ລາ ປະ​ເທດ​ຟິລິບ​ປິນ​ແຕ່​ວັນ​ທີ 10 ຫາ​ວັນ​ທີ 14 ພະຈິກ​ນີ້ ​ໂດຍ​ເນັ້ນຫົວ​ຂໍ້"​ໂອບກອດການ​ປ່ຽນ​ແປງ​ໃໝ່, ​ເຊື່ອມ​ໂຍງ​ກັບ​ໂລກ". ຂະນະ​ທີ່​ກອງ​ປະຊຸມ​ຜູ້ນຳ​ຂອງ​ບັນດາ​ຝ່າຍທີ່​ເຂົ້າຮ່ວມ​ການ​ເຈລະຈາ​ສັນຍາ​ການ​ພົວພັນ​ຄູ່​ເສດຖະກິດ​ຮອບດ້ານ​ໃນ​ພາກ​ພື້ນ ຫຼື RCEP ກໍ​ໄດ້​ຮັບ​ຄວາມສົນ​ໃຈ​​ເຊັ່ນ​ດຽວ​ກັນ. ນັກວິ​ເຄາະ​ຊີ້​​ໂດຍ​ສະ​ແດງ​ໃຫ້​ເ​ຫັນ​ວ່າ ​ເບື້ອງຫຼັງຂອງກະ​ແສ​ແນວ​ຄິດ​ຕ້ານ​ໂລກາ​ພິວັດ ​ແລະ ລັດທິ​ປົກ​ປ້ອງ​ການ​ຄ້າ​ກຳລັງ​ຄຶກຄັກ​ຢູ່​ນັ້ນ ອາ​ຊຽນກໍ​ບໍ່​ໄດ້​ບັ່ນ​ທອນ​ຄວາມ​ຕັດສິນ​ໃຈ​ຂອງ​ຕົນ​ໃນ​ການ​ເຂົ້າຮ່ວມ​ຂະ​ບວນການ​ໂລກາ​ພິວັດ, ຊຸກຍູ້​ການ​ເຊື່ອມ​ໂຍງ​ເສດຖະກິດ​ ​ແລະ ການ​ສ້າງ​ຄວາມ​ສະດວກ​ໃຫ້​ແກ່​ການ​ຄ້າ-ການ​ລົງທຶນ​ໃນພາກ​ພື້ນ.

ກອງ​ປະຊຸມ​ຜູ້ນຳ​ຂອງຝ່າຍຕ່າງໆ​ທີ່​ເຂົ້າຮ່ວມການ​ເຈລະຈາ RCEP ​​ເທື່ອ​ນີ້​ແມ່ນ​ກອງ​ປະຊຸມ​ຄັ້ງທຳ​ອິດ​ນັບ​ແຕ່​ເລີ່​ມ​ເປີດ​ການ​ເຈລະຈາ​ເປັນຕົ້ນມາ ​ໂດຍ​ຈະ​ເຈາະ​ຈົງ​ຫວນ​ຄືນ​ຄວາມ​ຄືບ​ໜ້າ​ຂອງ​ການ​ເຈລະຈາ, ຮັບ​ຟັງ​ບົດ​ລາຍ​ງານ​ການ​ປະ​ເມີນ​ຂອງ​ລັດຖະມົນຕີ​ເສດຖະກິດ​ການ​ຄ້າ​ຂອງ​ຝ່າຍ​ທີ່​​ເຂົ້າຮ່ວມ​ການ​ເຈລະຈາ ​ແລະ ​ໃຫ້ການ​ຊີ້​ນຳ​ທາງ​ການ​ເມືອງ​ເພື່ອຈະ​ເຈລະຈາ​ຕໍ່​ໄປ.

ການ​ເຈລະຈາ RCEP ​ແມ່ນ​ການ​ເຈລະຈາ​ການ​ຄ້າ​ເສລີ​ທີ່​ສຳຄັນ​ທັງມີ​ຜົນ​ສະທ້ອນ​ເລິກ​ເຊິ່ງ​ແລະ​ຍາວ​ນານ​ຢູ່​ພາກ​ພື້ນ​ອາຊີ​ປາຊີ​ຟິກ​ໃນ​ປັດ​ຈຸ​ບັນ ​ແລະ​ຖ້າ​ການ​ເຈລະຈາ​ສາມາດ​ປະສົບ​ຜົນສຳ​ເລັດ ກໍ​ຈະ​ກໍ່​ຕົວ​ເປັນ​ກຸ່ມ​ການ​ຄ້າ​ທີ່​ກວມ​ເອົາ​ປະຊາກອນ​ເຖິງ 3 ຕື້ຄົນ, ລວມຍອດ​ມູນ​ຄ່າ​ GDP ປະມານ 2.100 ຕື້​ໂດ​ລາ​ສະຫະລັດ ​ແລະ ກວມ​ຍອດ​ປະລິມານ​ການ​ຄ້າ​ໂລກ​ປະມານ 30% ​ທັງ​ອາດ​ຈະ​ຊຸກຍູ້​ໃຫ້​ບັນລຸ​ການ​ສ້າງ​ເຂດ​ການ​ຄ້າ​ເສລີ​ອາຊີ​ປາຊີ​ຟິກທີ່​ຂະຫຍາຍ​ຂອບ​ເຂດ​ກວ້າງ​ອອກ​ຕື່ມ​ອີກ​ກໍ​ເປັນ​ໄດ້.

ການ​ເຈລະຈາ RCEP ​ໄດ້​ເລີ່​ມຕົ້ນຢ່າງ​ເປັນ​ທາງ​ການ​ເມື່ອ​ເດືອນ​ພະຈິກ​ປີ 2012 ​ໂດຍ​ຝ່າຍຕ່າງໆ​ທີ່​ເຂົ້າ​ຮ່ວມ ຄື 10 ປະ​ເທດ​ໃນອາ​ຊຽນ ​ແລະ 6 ປະ​ເທດ​ຄູ່​​ເຈລະຈາ ຄື ຈີນ, ຍີ່ປຸ່ນ, ສ.​ເກົາຫຼີ, ອົສຕຣາລີ, ​ນູ​ແວນ​ເຊ​ລັງ ​ແລະ ອິນ​ເດຍ. ຂະນະ​ທີ່​​ເນື້ອ​ໃນການ​ເຈລະຈາ RCEP ​ໄດ້ກ່ຽວ​ພັນ​ເຖິງ 10 ກວ່າ​ຂົງ​ເຂດ ​ເຊັ່ນ ​ວິ​ສາ​ຫະກິດຂະໜາດ​ກາງ​ແລະ​ນ້ອຍ, ການ​ລົງທຶນ, ການ​ຮ່ວມ​ມື​ທາງ​ເຕັກນິກ​ເສດຖະກິດ, ການຄ້າສິນຄ້າ​ແລະ​ການ​ບໍລິການ ​ເປັນຕົ້ນ.

ນັບ​ແຕ່​ເລີ່​ມຕົ້ນການ​ເຈລະຈາ RCEP ​ເປັນຕົ້ນມາ ​ໄດ້​ດຳ​ເນີນ​ການ​ເຈລະຈາມາ​ແລ້ວ 20 ຮອບ ​ແລະ ກອງ​ປະຊຸມ​ລະດັບ​ລັດຖະມົນຕີ 8 ​ເທື່ອ. ຂະນະ​ທີ່ຝ່າຍ​ຕ່າງໆ​ກໍ​ໄດ້​ເຂົ້າສູ່​ໄລຍະ​ປຶກສາ​ຫາລືຢ່າງ​ຈິງ​ຈັງ​​ໃນ​ດ້ານ​ການ​ຄ້າ​ສິນຄ້າ, ການ​ຄ້າ​ບໍລິການ ​ແລະ ການ​ລົງທຶນ ​ແລະ​ປັດຈຸບັນ​ໄດ້​ສຳ​ເລັດ​ການ​ເຈລະຈາ​ກ່ຽວ​ກັບ​ການ​ຮ່ວມ​ມື​ທາງ​ເຕັກນິກ​ເສດຖະກິດ ​ແລະ ວິ​ສາ​ຫະກິດ​ຂະໜາດ​ກາງ​ແລະ​ນ້ອຍ​ແລ້ວ.

​ໃນ​ຖານະ​ເປັນ​ປະ​ເທດ​ປະທານ​ໝູນວຽນ​ອາ​ຊຽນ​ໃນ​ປີ​ນີ້, ຟິລິບ​ປິນ​ເຫັນ​ວ່າ ຖ້າ​ສຳ​ເລັດ​ການ​ເຈລະຈາ RCEP ກໍ​ຈະ​​ເປັນ​ການ​ສ້າງ​ໂອກາດ​ທີ່​ມະຫາສານ ​ແລະ​ເລີ່​ມ​ແຕ່​ຕົ້ນປີ​ນີ້​ເປັນຕົ້ນມາ, ຟິລິບ​ປິນກໍ​ມີ​ຄວາມ​ປາຖະໜາ​ອັນ​ແຮງ​ກ້າ​​ໃນ​ການ​ຊຸກຍູ້​ການ​ເຈລະຈາ​ດັ່ງກ່າວ. ຂະນະ​ທີ່​ໃນ​ປີ​ນີ້, ທ່ານ​ໂຣດຣີ​ໂກ ດູ​ເຕີ​ເຕ ປະທານາທິບໍດີ ​ແລະ ​ເຈົ້າໜ້າ​ທີ່​ລັດຖະບານຟິລິບ​ປິນອີກຫຼາຍທ່ານ ກໍ​ມີ​ຄຳ​ເຫັນ​ໃນ​ກໍລະນີ​ຕ່າງໆມາ​ແລ້ວຫຼາຍ​ເທື່ອ ​ໂດຍ​ຮຽກຮ້ອງ​ໃຫ້​ບັນດາ​ປະ​ເທດ​ໃນ​ອາ​ຊຽນຈົ່ງ​ໃຊ້​ທ່າ​ທີ​ທີ່​ຄ່ອງ​ແຄ້ວ​ໃນ​ການ​ເຈລະຈາ RCEP ​ແລະ ​ແກ້​ໄຂ​ບັນຫາ​ຕ່າງໆ​ທີ່​ປະສົບ​​ໃນ​ການ​ເຈລະຈາ​ດ້ວຍ​ລັກສະນະປະດິດ​ຄິດສ້າງ ​ເພື່ອ​ຕັ້ງໜ້າຊຸກຍູ້ຂະ​ບວນການ​ເຈລະຈາ​ດັ່ງກ່າວ.

ຂະນະ​ທີ່​ທ່ານ​ອູ​ເຈິ້ງ​ຜິ​ງ ຫົວໜ້າ​ກົມ​ອາຊີ ກະຊວງ​ການ​ຄ້າ​ຈີນ ກໍ​ໄດ້​ກ່າວ​ຂະນະ​ເຂົ້າຮ່ວມ​ກອງ​ປະຊຸມລັດຖະມົນຕີ​ເສດຖະກິດ​ການ​ຄ້າ​ການ​ຮ່ວມ​ມື​ອາຊີຕ່າງໆ​​ໃນ​ເດືອນ​ກັນຍາ​ຜ່ານ​ມາ​ນີ້​ວ່າ: ການ​ທີ່​ຊຸກຍູ້​ການ​ເຈລະຈາ RCEP ​​ໃຫ້​ຄືບ​ໜ້າໂດຍ​ໄວ​ແມ່ນ​ຄວາມ​ປາຖະໜາ​ຮ່ວມ​ຂອງ​ຈີນ​ແລະ​ອາ​ຊຽນ, ຈີນ​ແລະ​ອາ​ຊຽນ ຕ່າງ​ກໍ​ແມ່ນ​ພະລັງ​ທາງ​ບວກ​ແຫ່ງ​ການ​ຊຸກຍູ້ການ​ເຈລະຈາ RCEP, ສອງ​ຝ່າຍ​ຍິນ​ດີ​ເພີ່ມ​ທະວີ​ການ​ປະສານ​ສົມທົບ​ກັນ ​ເພື່ອ​ເຮັດ​ໃຫ້ການ​ເຈລະຈາ RCEP ປະສົບ​ຜົນສຳ​ເລັດ​​ໂດຍ​ໄວ ຄື ໃນ​ປີ​ນີ້ ຫຼື ປີໜ້າ.

ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ