​ນາຍົກລັດຖະມົນຕີຈີນ ​ແລະກຳປູ​ເຈຍພົບ​ປະກັນ​ຢູ່​ຟິລິ​ປິນ
2017-11-14 11:15:21  cri 
ຕອນ​ບ່າຍ​ວັນ​ທີ 13 ພະຈິກ​ນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະກັບທ່ານຮຸນ​ເຊັນ ນາຍົກລັດຖະມົນຕີກຳປູ​ເຈຍ​ຢູ່​ໂຮງ​ແຮມ​ມະນີ​ລາ.

ທ່ານຫຼີ​ເຄີ້ສຽງ​ກ່າວ​ວ່າ: ປະ​ເທດ​ຈີນ-ກຳປູ​ເຈຍ​​ເປັນ​ເພື່ອນ​ມິດ​ກັນຢ່າງ​ຈິງ​ໃຈ. ​ເວລາ​ໃດ​ກໍສະໜັບສະໜູນ​ກຳປູ​ເຈຍ​ສືບ​ຕໍ່​ພັດທະນາ​ຕາມ​ແນວທາງ​ທີ່​ສອດຄ່ອງ​ກັບ​ສະພາບ​ການ​ຕົວ​ຈິງ ລວມທັງສະໜັບສະໜູນ​ກຳປູ​ເຈຍ​ຮັກສາ​​ອະທິປະ​ໄຕ, ຄວາມ​ເປັນ​ເອກະລາດ, ຄວາມ​ໝັ້ນຄົງ​ພາຍ​ໃນ​ປະ​ເທດ ​ແລະ​ຄວາມ​ພະຍາຍາມ​ໃນ​ການ​ເລັ່ງ​ພັດທະນາ​ເສດຖະກິດ. ຂະນະ​ດຽວ​ກັນ​ກໍ​ຍິນ​ດີ​ຮັກສາ​ການພົບ​ປະ​ຢ້ຽມຢາມ​ຂອງການນຳ​ຂັ້ນ​ສູງສອງ​ປະ​ເທດ, ​ເພີ່ມ​ທະວີ​ການ​ຮ່ວມ​ມື​ຕົວ​ຈິງ​ໃນ​ຂົງ​ເຂດ​ຕ່າງໆ, ສົ່ງ​ເສີມ​ການ​ແລກປ່ຽນ​ດ້ານວັດທະນະທຳ​ ​ແລະ​ຮ່ວມ​ກັນ​ຈັດ​ກິດຈະກຳ​ສະ​ເຫຼີ​ມສະຫຼອງ​ການ​ສ້າງຕັ້ງ​ສາຍ​ພົວພັນ​ການ​ທູດ​ຈີນ-ກຳປູ​ເຈຍ​ຄົບຮອບ 60 ປີ​ໃນ​ປີໜ້າ, ສະ​ໜັບສະ​ໜູນ​ການ​ຈັດ​ກອງ​ປະຊຸມ​ຜູ້​ນຳ​ການ​ຮ່ວມ​ມື​ແມ່​ນ້ຳລ້ານ​ຊ້າງ-​ແມ່​ນ້ຳຂອງ​ເທື່ອ​ທີ​ສອງທີ່​ຈະ​ຈັດ​ຂຶ້ນ​ຢູ່ກຳ​ປູ​ເຈຍ​ໃນ​ປີໜ້າ ​ເພື່ອ​ຊຸກຍູ້​ສາຍ​ພົວພັນ​ຈີນ-​ກຳປູ​ເຈຍ​ໃຫ້​ດີ​ຂຶ້ນ​ກວ່າ​ເກົ່າ ​ແລະ​ປະກອບ​ສ່ວນ​ເຂົ້າ​ໃນ​ການ​ພັດທະນາ​ພາກ​ພື້ນ​ໃຫ້​ໝັ້ນຄົງ.

ທ່ານຮຸນ​ເຊັນ​ກ່າວ​ວ່າ: ​ກຳ​ປູ​ເຈຍ-ຈີນ​ມີ​ສາຍ​ພົວພັນໄມຕີ​ຈິດ​ມິດຕະພາບ​ທີ່​ດີ ​ແລະ​ໃນ​ໂອກາດປີ 2018 ​ເປັນ​ປີ​ຄົບຮອບ 60 ປີ​ໃນ​ການ​ສ້າງຕັ້ງ​ສາຍ​ພົວພັນ​ການ​ທູດ​ກຳປູ​ເຈຍ-ຈີນ, ​ປະ​ເທດ​ຕົນ​ຈະ​ຈັດ​ກອງ​ປະຊຸມ​ຜູ້ນຳ​ການ​ຮ່ວມ​ມື​ແມ່​ນ້ຳ​ລ້ານຊ້າງ-​ແມ່​ນ້ຳຂອງ​​ເທື່ອ​ທີ​ສອງ ​ເຊິ່ງຈະ​ເຮັດ​ໃຫ້​ສາຍ​ພົວພັນ​ສອງ​ຊາດ​ເຂົ້າ​ສູ່​ໄລຍະ​ໃໝ່. ຂະນະ​ດຽວ​ກັນ​ກໍຍິນ​ດີ​ເພີ່ມ​ທະວີ​ການ​ແລກປ່ຽນ​ ​ແລະຮ່ວມ​ມື​ໃນ​ຂົງ​ເຂດ​ຕ່າງໆ ​ເປັນ​ຕົ້ນ ການ​ປົກຄອງ​ປະ​ເທດ, ການ​ສ້າງ​ພື້ນຖານ​ໂຄງ​ລ່າງ ​ແລະ​ອື່ນໆ ທັງຊຸກຍູ້​ການ​ພັດທະນາ​ສາຍ​ພົວພັນ​ຄູ່​ຮ່ວມມື​ຍຸດ​ທະ​ສາດ​ຮອບດ້ານ​ໃຫ້ດີ​ຂຶ້ນ​ຕື່ມ​ອີກ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ