ວັນທີ 14 ພະຈິກນີ້ ຢູ່ນະຄອນຫຼວງບາງກອກປະເທດໄທ, ມະຫາວິທະຍາໄລຈົ່ງນານຈີນແລະມະຫາວິທະຍາໄລເຕັກໂນໂລຊີພະຈອມເກົ້າທົນບູຣີໄທໄດ້ເຊັນບົດບັນທຶກການຮ່ວມມື ໂດຍຈະຮ່ວມກັນສ້າງບຸກຄະລາກອນເຕັກນິກທາງລົດໄຟໃຫ້ປະເທດໃນອາຊຽນລວມທັງປະເທດໄທດ້ວຍ.
ທ່ານ ເສີນຊຸ່ນຢາງ ຮອງຜູ້ອຳນວຍການໃຫຍ່ມະຫາວິທະຍາໄລຈົ່ງນານກ່າວວ່າ: ມະຫາວິທະຍາໄລຕົນປະສົບຜົນສຳເລັດໃນຂົງເຂດຄົມມະນາຄົມທາງລົດໄຟ ແລະໄດ້ຕັ້ງໜ້າປະກອບສ່ວນພັດທະນາທາງລົດໄຟຄວາມໄວສູງຂອງຈີນ. ຄຽງຄູ່ກັບການຈັດຕັ້ງປະຕິບັດຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ",ຫວັງວ່າຈະສ້າງການພົວພັນຮ່ວມມືແບບຍາວນານກັບມະຫາວິທະຍາໄລຂອງໄທໃນຂົງເຂດຄົມມະນາຄົມທາງລົດໄຟ,ສ້າງສະຖາບັນທາງລົດໄຟສາກົນ,ຮ່ວມກັບມະຫາວິທະຍາໄລເຕັກໂນໂລຊີພະຈອມເກົ້າທົນບູຣີໄທເລີ່ມດຳເນີນຮູບແບບການອົບຮົມ "2+2" ເທື່ອລະກ້າວ ເພື່ອສ້າງບຸກຄະລາກອນໃຫ້ແກ່ການພັດທະນາຄົມມະນາຄົມທາງລົດໄຟຂອງອາຊຽນ.
ທ່ານ ພິນິດ ຈາຣຸສົມບັດ ປະທານຄະນະກຳມະການສົ່ງເສີມວັດທະນະທຳໄທ-ຈີນ,ອະດີດຮອງນາຍົກລັດຖະມົນຕີໄທກ່າວໃນມື້ດັ່ງກ່າວວ່າ: ຈາກການເຫັນເຕັກໂນໂລຊີທາງລົດໄຟຂອງຈີນມີຄວາມກ້າວໜ້າແລະມີຜົນງານຢ່າງໃຫຍ່ຫຼວງ ຈຶ່ງເຊື່ອວ່າການຮ່ວມມືລະຫວ່າງມະຫາວິທະຍາໄລຂອງສອງປະເທດຈະຊຸກຍູ້ການພັດທະນາຄົມມະນາຄົມທາງລົດໄຟລະຫວ່າງຈີນ-ອາຊຽນ.