ສື່ມວນຊົນອີຣານລາຍງານໃນວັນທີ 15 ພະຈິກນີ້ວ່າ: ແຜ່ນດິນໄຫວຮຸນແຮງທີ່ເກີດຂຶ້ນຢູ່ເຂດຊາຍແດນອີຣານ-ອີຣັກໃນຕອນຄ່ຳວັນທີ 12 ພະຈິກນີ້ ໄດ້ສົ່ງຜົນເຮັດໃຫ້ຢູ່ເຂດປະສົບໄພປະເທດຕົນມີຜູ້ເສຍຊີວິດເພີ່ມຂຶ້ນເປັນ 474 ຄົນແລ້ວ ແລະ 9.388 ຄົນໄດ້ຮັບບາດເຈັບ.
ຂ່າວສານຕັສນິມ ອີຣານ ຍັງລາຍງານວ່າ: ຄຽງຄູ່ກັບການຂຸ້ນຂ້ຽວກູ້ໄພນັ້ນ ກໍຄາດວ່າຍັງຈະພົບຜູ້ເສຍຊີວິດແລະບາດເຈັບເພີ່ມຂຶ້ນອີກ. ຂະນະທີ່ຫຼັງເກີດແຜ່ນດິນໄຫວໃນວັນທີ 12 ເປັນຕົ້ນມາ, ກໍມີແຮງສັ່ນສະເທືອນຕາມມາຫຼາຍກວ່າ 280 ເທື່ອ ເຊິ່ງລະດັບແຮງສັ່ນສະເທືອນຢູ່ລະຫວ່າງ 4,5 ຫາ 6,1 ຣິກເຕີ.
ຢູ່ເຂດປະສົບໄພ ດ້ວຍໃນຕອນຄ່ຳອຸນຫະພູມຈະຕ່ຳລົງຫຼາຍ, ຜູ້ປະສົບໄພນັບພັນໝື່ນຄົນຍັງຈຳຕ້ອງພັກຢູ່ໃນຕູບຜ້າທີ່ຕັ້ງຂຶ້ນຊົ່ວຄາວ ຫຼື ຄ້າງຄືນຢູ່ນອກສະໜາມ. ນອກນີ້, ບັນຫາການຂາດນ້ຳດື່ມ ແລະ ອາຫານຢ່າງໜັກໜ່ວງ, ເສັ້ນທາງ ແລະ ເຄືອຂ່າຍການສື່ສານກໍຍັງບໍ່ສາມາດຟື້ນຟູໃຊ້ໄດ້, ຂະນະທີ່ປັດຈຸບັນ ການຊ່ວຍເຫຼືອແລະກູ້ໄພກໍເກີດຄວາມຊັກຊ້າ.
