ຕອນຄ່ຳວັນທີ 15 ພະຈິກນີ້, ລັດຖະບານໄທໄດ້ປະກາດເລີ່ມເປີດ "ປີທ່ອງທ່ຽວອັດສະຈັນໄທແລນ 2018" ຢ່າງເປັນທາງການ ເພື່ອສືບຕໍ່ຊຸກຍູ້ການພັດທະນາຂະແໜງການທ່ອງທ່ຽວໃນປີໃໝ່ ແລະ ມີແຜນອຳນວຍການບໍລິການທ່ອງທ່ຽວສະເພາະໃຫ້ແກ່ນັກທ່ອງທ່ຽວຈີນທີ່ມີສ່ວນຕໍ່ຂະແໜງການທ່ອງທ່ຽວໄທຫຼາຍກວ່າໝູ່ ເຊັ່ນ ໃຫ້ປະກັນໄພເປັນຕົ້ນ.
ທ່ານນາງກອບການ ວັດທະນະວະຣາງກູນ ລັດຖະມົນຕີກະຊວງທ່ອງທ່ຽວແລະກິລາໄທ ກ່າວໃນພິທີເປີດວ່າ: "ປີທ່ອງທ່ຽວອັດສະຈັນໄທແລນ 2018" ຈະເລີ່ມຕົ້ນແຕ່ເດືອນພະຈິກປີນີ້ຈົນເຖິງວັນທີ 1 ມັງກອນປີ 2019, ຂະນະທີ່ລັດຖະບານປະເທດຕົນໝັ້ນໃຈວ່າ: ການຈັດກິດຈະກຳຕ່າງໆ ຈະສາມາດຊຸກຍູ້ຮູບແບບການທ່ອງທ່ຽວໄດ້ຫຼາຍຂຶ້ນ ເຊັ່ນ ການທ່ອງທ່ຽວກິລາ, ອາຫານ, ລາຍການເທິງໜ້ານ້ຳ, ລາຍການແຕ່ງດອງ, ການປິ່ນປົວສຸຂະພາບ ແລະ ພັກຜ່ອນຢ່ອນອາລົມມີການພັດທະນາ, ສ້າງລາຍຮັບໃຫ້ປະຊາຊົນເພີ່ມຂຶ້ນ ແລະຊຸກຍູ້ການພັດທະນາເສດຖະກິດສັງຄົມ.
ກະຊວງທ່ອງທ່ຽວແລະກິລາໄທ ເປີດເຜີຍວ່າ ນັບແຕ່ເດືອນມັງກອນຫາເດືອນກັນຍາປີນີ້, ມີນັກທ່ອງທ່ຽວຈີນ 7.393.900 ເທື່ອຄົນເຂົ້າມາທ່ຽວ ເພີ່ມຂຶ້ນກວ່າ 1% ເມື່ອທຽບໃສ່ໄລຍະດຽວກັນຂອງປີຜ່ານມາ ແລະກວມອັດຕານັກທ່ອງທ່ຽວຕ່າງປະເທດເຖິງ 28,33%.
