ສະຫະພັນໂທລະຄົມໂລກ ຂອງອົງການສະຫະປະຊາຊາດ ໄດ້ເຜີຍແຜ່ບົດລາຍງານຫຼ້າສຸດ ໂດຍລະບຸວ່າ: ເຕັກນິກການສື່ສານຂໍ້ມູນຂ່າວສານ ແລະ ເສດຖະກິດດີຈີຕອນ ອາດຈະເຮັດໃຫ້ຊີວິດການເປັນຢູ່ຂອງປະຊາກອນໂລກຫຼາຍຕື້ຄົນເກີດການປ່ຽນແປງ, ແຕ່ມີເງື່ອນໄຂເບື້ອງຕົ້ນ ກໍຄືທຸກຄົນຕ້ອງມີໂອກາດນຳໃຊ້ເຕັກນິກແລະຊັບພະຍາກອນເຫຼົ່ານີ້ ສະນັ້ນຈຶ່ງຄວນລົບລ້າງ "ຄວາມແຕກໂຕນທາງດີຈີຕອນ" ທີ່ນັບມື້ຂະຫຍາຍເປັນວົງກວ້າງໃນທົ່ວໂລກໂດຍໄວ.
ທັງນີ້ ສະຫະພັນໂທລະຄົມໂລກໄດ້ເຜີຍແຜ່ "ບົດລາຍງານການກວດສອບແລະປະເມີນສັງຄົມຂໍ້ມູນຂ່າວສານ" ໃນວັນທີ 15 ພະຈິກນີ້ ໂດຍຊີ້ໃຫ້ເຫັນວ່າ: ການພັດທະນາຄວບຄູ່ກັນດ້ານ IOT, ການວິໄຈຖານຂໍ້ມູນໃຫຍ່ (Big data), ການຄຳນວນແບບຄຼາວ (cloud computing) ແລະ ສະຕິປັນຍາທຽມ (AI) ຈະຊຸກຍູ້ການປະດິດສ້າງຂະໜາດໃຫຍ່ ເຊິ່ງເປັນຜົນດີຕໍ່ການບັນລຸເປົ້າໝາຍການພັດທະນາແບບຍືນຍົງຂອງອົງການສະຫະປະຊາຊາດ ທັງຈະປ່ຽນແປງຮູບແບບການເຄື່ອນໄຫວຂອງການດຳເນີນທຸລະກິດ, ລັດຖະບານ ກໍຄືທົ່ວສັງຄົມ ທັງສາມາດປັບປຸງຊີວິດການເປັນຢູ່ຂອງປະຊາຊົນທົ່ວໂລກໃຫ້ດີຂຶ້ນໃນທີ່ສຸດ.
ໃນຫຼາຍປີຜ່ານມາ, ເຖິງວ່າບາງປະເທດດ້ອຍພັດທະນາໄດ້ມີຄວາມຄືບໜ້າບໍ່ໜ້ອຍໃນການປັບປຸງພື້ນຖານໂຄງລ່າງການສື່ສານກໍຕາມ, ແຕ່ໃນຕົວເລກດັດຊະນີທີ່ສຳຄັນ ເຊັ່ນ ຜູ້ນຳໃຊ້ອິນເຕີເນັດ ຍັງຫຼ້າຫຼັງຫຼາຍ ຈຶ່ງກະທົບເຖິງຖານະເສດຖະກິດດີຈີຕອນຂອງປະເທດເຫຼົ່ານີ້.