ທ່ານຮູອານ ຄາໂລສ ວາເຣລາ ປະທານາທິບໍດີປານາມາ ທີ່ພວມຢ້ຽມຢາມຢູ່ຈີນ ໄດ້ກ່າວໃນວັນທີ 20 ພະຈິກນີ້ວ່າ: ຈະອຳນວຍຄວາມສະດວກໃຫ້ແກ່ຈີນທີ່ໄປລົງທຶນຢູ່ປະເທດຕົນ ແລະເຊື່ອໝັ້ນວ່າ ປະເທດຕົນຈະກາຍເປັນສູນກາງການລົງທຶນພັດທະນາທຸລະກິດຂອງວິສາຫະກິດຈີນຢູ່ອາເມລິກາລາຕິນ.
ທ່ານວາເຣລາ ກ່າວວ່າ: ປະເທດຕົນສະໜັບສະໜູນຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແລະໄດ້ສະເໜີໂຄງການຮ່ວມມືການກໍ່ສ້າງພື້ນຖານໂຄງລ່າງຈຳນວນໜຶ່ງແລ້ວ ໂດຍສະເພາະພວມສຶກສາຄົ້ນຄວ້າກໍ່ສ້າງທາງລົດໄຟທີ່ເນັ່ງໄປສູ່ໂກສຕາຣີກາ ຫວັງວ່າຈີນຈະສະໜັບສະໜູນເງິນທຶນ ແລະ ເຕັກນິກ ເພື່ອເຂົ້າຮ່ວມກໍ່ສ້າງ.
ທ່ານວາເຣລາ ຍັງໃຫ້ຮູ້ຕື່ມວ່າ: ປະເທດຕົນໄດ້ຮ່ວມມືກັບຈີນໃນຂົງເຂດອື່ນໆ ເປັນຕົ້ນ ການກໍ່ສ້າງທ່າກຳປັ່ນ ແລະຫວັງວ່າຈະສາມາດສ້າງໂຄງການທ່ອງທ່ຽວຂີ່ເຮືອສຳລານໃຫ້ແກ່ນັກທ່ອງທ່ຽວຈີນ. ນອກນີ້, ພົນລະເມືອງຈີນຂໍວີຊາໄປປານາມາໃນປັດຈຸບັນກໍໃຊ້ເວລາແຕ່ 24-48 ຊົ່ວໂມງເທົ່ານັ້ນ ແລະຍິນດີອຳນວຍຄວາມສະດວກດ້ານຕ່າງໆຕື່ມອີກ.
