ທ່ານຊົ້ງທ່າວ ທູດພິເສດຂອງທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນໄດ້ເດີນທາງຢ້ຽມຢາມສປປ ເກົາຫຼີແຕ່ວັນທີ 17 ຫາວັນທີ 20 ພະຈິກນີ້ ແລະໄດ້ພັບປະກັບຜູ້ນຳສູນກາງພັກແຮງງານສປປ ເກົາຫຼີ. ໂອກາດດັ່ງກ່າວ, ທ່ານຊົ້ງທ່າວໄດ້ແຈ້ງເນື້ອໃນຕົ້ນຕໍ ແລະຜົນສຳເລັດຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນ. ຂະນະທີ່ສປປ ເກົາຫຼີກໍໄດ້ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມດັ່ງກ່າວ ແລະອວຍພອນໃຫ້ປະຊາຊົນຈີນປະສົບຜົນສຳເລັດຢ່າງຍິ່ງໃຫຍ່ໃນຂະບວນການສ້າງປະເທດເຂັ້ມແຂງທັນສະໄໝແບບສັງຄົມນິຍົມທີ່ມີສີສັນພິເສດຂອງຈີນ ແລະບັນລຸຄວາມຝັນຟື້ນຟູຄວາມຈະເລີນຮຸ່ງເຮືອງປະຊາຊາດຈີນ ພາຍໃຕ້ການນຳພາຂອງສູນກາງພັກກອມມູນິດຈີນໂດຍທ່ານສີຈິ້ນຜິງເປັນແກນນຳ.
ສອງຝ່າຍຈີນ-ສປປ ເກົາຫຼີໄດ້ແລກປ່ຽນຄຳຄິດເຫັນກ່ຽວກັບສາຍພົວພັນລະຫວ່າງສອງພັກ-ສອງລັດ, ບັນຫາແຫຼມເກົາຫຼີ ແລະບັນຫາອື່ນໆທີ່ສົນໃຈຮ່ວມກັນ ແລະພ້ອມຈະເພີ່ມທະວີການໄປມາຫາສູ່ກັນລະຫວ່າງສອງພັກ ເພື່ອຊຸກຍູ້ສາຍພົວພັນຈີນ-ສປປ ເກົາຫຼີໃຫ້ພັດທະນາດີຂຶ້ນກວ່າເກົ່າ.