ລັດຖະບານໄທ ເປີດເຜີຍເມື່ອບໍ່ດົນມານີ້ວ່າ: ໃນໄຕມາດທີ 3 ປີນີ້, ເສດຖະກິດປະເທດຕົນໄດ້ເຕີບໂຕ 4,3% ເມື່ອທຽບໃສ່ໄລຍະດຽວກັນຂອງປີຜ່ານມາ ແລະເປັນຈັງຫວະການເຕີບໂຕຢູ່ໃນລະດັບສູງສຸດນັບແຕ່ໄຕມາດທີ 2 ຂອງປີ 2013 ເປັນຕົ້ນມາ.
ຄະນະກຳມະການພັດທະນາເສດຖະກິດ-ສັງຄົມແຫ່ງຊາດໄທ ຢືນຢັນວ່າ: ໃນໄຕມາດທີ 3 ປີນີ້, ການທີ່ເສດຖະກິດເຕີບໂຕໄວຂຶ້ນນັ້ນຕົ້ນຕໍມາຈາກການເຕີບໂຕຂອງການສົ່ງອອກແລະອຸດສາຫະກຳທ່ອງທ່ຽວ. ນອກນີ້, ການບໍລິໂພກ ແລະການລົງທຶນຂອງພາກເອກະຊົນພາຍໃນປະເທດກໍເພີ່ມຂຶ້ນ. ຈາກນີ້ ຈຶ່ງຄາດວ່າປີນີ້, ເສດຖະກິດປະເທດຕົນຈະເຕີບໂຕປະມານ 3,9% ແລະ ປີໜ້າຈະເຕີບໂຕລະຫວ່າງ 3,6%-4,6%.
ຂ່າວລາຍງານຕື່ມວ່າ: ກະຊວງທ່ອງທ່ຽວແລະກິລາໄທ ໄດ້ເປີດເຜີຍຫວ່າງມໍ່ໆມານີ້ວ່າ: ນັບແຕ່ເດືອນມັງກອນຫາເດືອນຕຸລາປີນີ້ ໂດຍລວມແລ້ວ, ນັກທ່ອງທ່ຽວເຂົ້າມາທ່ຽວບັນລຸເຖິງ 28 ລ້ານ 8 ແສນ 2 ໝື່ນເທື່ອຄົນ ເພີ່ມຂຶ້ນເກືອບ 6,7% ເມື່ອທຽບໃສ່ໄລຍະດຽວກັນຂອງປີຜ່ານມາ ໃນນີ້, ນັກທ່ອງທ່ຽວຈາກແຜ່ນດິນໃຫຍ່ຈີນມີປະມານ 8 ລ້ານ 2 ແສນເທື່ອຄົນ ເພີ່ມຂຶ້ນ 5,26% ເມື່ອທຽບໃສ່ໄລຍະດຽວກັນຂອງປີຜ່ານມາ ແລະ ກວມຍອດຈຳນວນນັກທ່ອງທ່ຽວຕ່າງປະເທດເຖິງ 28,45%.
