ທ່ານ ເຊີເກ ກລາຊີເຢັຟ ທີ່ປຶກສາປະທານາທິບໍດີຣັດເຊຍ ກ່າວໃນວັນທີ 21 ພະຈິກນີ້ວ່າ, ການເຊື່ອມຈອດກັນລະຫວ່າງ "ໜຶ່ງແລວທາງໜຶ່ງເສັ້ນທາງ" ກັບສະຫະພັນເສດຖະກິດເອີຣົບ-ອາຊີ ຈະຊຸກຍູ້ການຮ່ວມມືດ້ານການລົງທຶນລະຫວ່າງສອງປະເທດ ແລະ ຊຸກຍູ້ການຮ່ວມມືທາງເສດຖະກິດການຄ້າສອງຝ່າຍ ໃຫ້ຂະຫຍາຍສູງຂຶ້ນກວ່າເກົ່າ.
ທ່ານ ກລາຊີເຢັຟ ກ່າວໃນໂອກາດເຂົ້າຮ່ວມກອງປະຊຸມເວທີປຶກສາຫາລືການຮ່ວມມືຄວາມສາມາດການຜະລິດສາກົນ 2017 ແລະ ງານພົບປະສັງສັນການຮ່ວມມືລົງທຶນກັບພາຍນອກຂອງຈີນຄັ້ງທີ 9 ຢູ່ນະຄອນຫຼວງປັກກິ່ງວ່າ, ການພົວພັນເສດຖະກິດການຄ້າຈີນ-ຣັດເຊຍ ສ້າງຂຶ້ນບົນພື້ນຖານການຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ ແລະມີທ່າແຮງຊ່ວຍຊູຍູ້ໜູນກັນ ເຊິ່ງເປັນສາເຫດສຳຄັນທີ່ວົງການການຄ້າຣັດເຊຍ ສະໜັບສະໜູນການເຊື່ອມຈອດລະຫວ່າງ "ໜຶ່ງແລວທາງໜຶ່ງເສັ້ນທາງ" ກັບ ສະຫະພັນເສດຖະກິດເອີຣົບ-ອາຊີຢ່າງກວ້າງຂວາງ.
ທ່ານ ກລາຊີເຢັຟ ກ່າວຕື່ມວ່າ, ຣັດເຊຍໄດ້ລົງທຶນຢູ່ຕ່າງປະເທດຢ່າງຫຼວງ ຫຼາຍ, ແຕ່ຢູ່ຈີນ ແລະ ໂຄງການເຊື່ອມຈອດລະຫວ່າງ "ໜຶ່ງແລວທາງໜຶ່ງເສັ້ນທາງ" ກັບ ສະຫະພັນເສດຖະກິດເອີຣົບ-ອາຊີ ນັ້ນຍັງອ່າວໜ້ອຍ, ສະນັ້ນ, ການຮ່ວມມືດ້ານການລົງທຶນລະຫວ່າງສອງປະເທດ ຈຶ່ງມີກຳລັງບົ່ມຊ້ອນຢ່າງມະຫາສານ. ແນວໃດກໍດີ, ສອງປະເທດຄວນຊຸກຍູ້ການຊຳລະສະສາງດ້ວຍເງິນຕາສະກຸນຕົນຂອງສອງຝ່າຍ, ລົງເລິກການຮ່ວມມືລະຫວ່າງທະນາຄານ ແລະເພີ່ມທະວີການຮ່ວມມືໃນຕະຫຼາດການທະນາຄານ.
ຂ່າວແຈ້ງວ່າ, ໃນຊຸມປີມໍ່ໆມານີ້, ການພົວພັນທາງເສດຖະກິດການຄ້າລະຫວ່າງຈີນກັບຣັດເຊຍ ໄດ້ຂະຫຍາຍຕົວຢ່າງຕໍ່ເນື່ອງ ແລະມີທ່າອ່ຽງທີ່ດີ ເຊິ່ງເຫັນໄດ້ຈາກຈີນເປັນຄູ່ການຄ້າໃຫຍ່ອັນດັບໜຶ່ງຂອງຣັດເຊຍໃນຫຼາຍປີຕິດຕໍ່ກັນ ແລະ ສະຖິຕິກໍສະແດງໃຫ້ເຫັນວ່າ, ນັບແຕ່ເດືອນມັງກອນເຖິງເດືອນກັນຍາປີນີ້, ມູນຄ່າການຄ້າຈີນ-ຣັດເຊຍ ໄດ້ບັນລຸເຖິງ 61 ຕື້ 380 ລ້ານໂດລາ ເຊິ່ງເພີ່ມຂຶ້ນ 22,4% ເມື່ອທຽບໃສ່ໄລຍະດຽວກັນປີຜ່ານມາ.
 |
