ສື່ມວນຊົນໄທລາຍງານໃນວັນທີ 22 ພະຈິກນີ້ວ່າ: ເມື່ອບໍ່ດົນມານີ້, ສະຫະພັນເຕະບານປະເທດຕົນໄດ້ເຜີຍຂ່າວລົ້ມບານ ແລະຈາກນັ້ນເຈົ້າໜ້າທີ່ຕຳຫຼວດກໍຈັບຜູ້ຕ້ອງສົງໄສ 12 ຄົນ.
ນາຍຕຳຫຼວດໄທໄດ້ກ່າວໃນພິທີຖະແຫຼງຂ່າວວ່າ: ຂ່າວລົ້ມບານເທື່ອນີ້ໄດ້ກ່ຽວພັນເຖິງການແຂ່ງຂັນພຣີເມຍລິກຂອງປະເທດຕົນ 4 ນັດ ແລະຜູ້ຕ້ອງສົງໄສລວມທັງຄູຝຶກ, ນັກເຕະ, ກຳມະການ ແລະ ຫົວໜ້າສະໂມສອນເປັນຕົ້ນ. ໃນການສືບສວນ ຫຼັງເກັບກຳຫຼັກຖານເປັນເວລາເກືອບ 1 ປີນັ້ນ, ເຈົ້າໜ້າທີ່ຕຳຫຼວດສາມາດສືບຮູ້ທີ່ມາ, ທີ່ໄປ ແລະການຄວບຄຸມທຶນໄດ້ຢ່າງຈະແຈ້ງ ທັງສາມາດກຳໄດ້ຫຼັກຖານອັນໜັກແໜ້ນທີ່ຢືນຢັນວ່າຜູ້ຕ້ອງສົງໄສມີກະທຳຜິດກົດໝາຍອາຍາ ຈຶ່ງຍື່ນຟ້ອງຕໍ່ສານເພື່ອຂໍໝາຍຈັບ. ນອກນີ້, ເຈົ້າໜ້າທີ່ຕຳຫຼວດຍັງ ເປີດເຜີຍຕື່ມວ່າ: ໃນເຫດການລົ້ມບານເທື່ອນີ້, ເງິນສິນບົນມີຫຼາຍສຸດເຖິງ 27.000 ໂດລາສະຫະລັດຕໍ່ນັດ.
ຂ່າວລາຍງານຕື່ມວ່າ: ປັດຈຸບັນ, ຜູ້ຕ້ອງສົງໄສ 12 ຄົນໄດ້ປະກັນຕົວແລ້ວ, ຂະນະທີ່ອົງການທີ່ກ່ຽວຂ້ອງພວມສືບສວນ-ສອບສວນເຫດການດັ່ງກ່າວຕື່ມ.