ພິທີເປີດເທສະການ ບຸນກິນຈຽງເຜົ່າມົ້ງ ເພື່ອສົ່ງທ້າຍປີເກົ່າ-ຕ້ອນຮັບປີໃໝ່ ປະຈຳສົກປີ 2017-2018 ໄດ້ຈັດຂຶ້ນ ຢ່າງຄຶກຄື້ນ ໃນວັນທີ 22 ພະຈິກ ຢູ່ສະໂມສອນກິລາ-ກາຍຍະກຳພື້ນເມືອງ, ບ້ານສຳເກດ ເມືອງໄຊທານີ ນະຄອນຫລວງວຽງຈັນ ໂດຍມີທ່ານນາງ ຍອດແກ້ວມະນີ ສຸພານຸວົງຮອງປະທານສູນກາງແນວລາວສ້າງຊາດ, ທ່ານ ລີຕູ ບົວປາວ ອະດີດຮອງລັດຖະມົນຕີກະຊວງສຶກສາທິການ ແລະ ກິລາ, ພ້ອມດ້ວຍພີ່ນ້ອງເຜົ່າມົ້ງ ເຂົ້າຮ່ວມ ເປັນຈຳນວນຫລວງຫລາຍ. ທັງນີ້ ກໍເພື່ອໃຫ້ປະຊາຊົນລາວ ແລະ ລູກຫລານຂອງຊົນເຜົ່າມົ້ງ ໄດ້ຮູ້ຈັກເທສະການບຸນກິນຈຽງເຜົ່າມົ້ງ, ທັງເປັນການປົກປັກຮັກສາ ຮີດຄອງປະເພນີອັນດີງາມ ຂອງຊົນເຜົ່າມົ້ງ ໃຫ້ຄົງຢູ່ຄູ່ຄົນລາວຕະຫລອດໄປ.
ທ່ານ ທອງສະຫວັດ ວົງສະຫວ່າງ ຫົວໜ້າພະແນກກິລາພື້ນເມືອງ, ກົມກິລາມວນຊົນ ກະ ຊວງສຶກສາທິການ ແລະ ກິລາ ໄດ້ໃຫ້ຮູ້ວ່າ: ເທສະການບຸນກິນຈຽງ ແມ່ນບຸນປີໃໝ່ຂອງເຜົ່າມົ້ງ, ເປັນບຸນປະເພນີ ທີ່ເຄີຍຈັດຂຶ້ນໃນທຸກໆປີ ຫລັງຈາກທີ່ໄດ້ສຳເລັດ ການເກັບກ່ຽວຜົນຜະລິດ ໃນຮອບໜຶ່ງປີ ເຊິ່ງຈະຕ້ອງໄດ້ເຮັດພິທີບູຊາ ເຖິງບັນພະບູລຸດ, ປູ່ຍ່າຕາຍາຍ, ຜີບ້ານຜີເມືອງ ທີ່ໃຫ້ຄວາມຄຸ້ມຄອງ ແລະ ດູແລ, ໃຫ້ຄວາມສຸກສຳລານຕະຫລອດປີ ເຊິ່ງແຕ່ລະບ້ານ ຈະມີການສະເຫລີມສະຫລອງ ຢ່າງພ້ອມພຽງກັນ ຫລື ຕາມວັນເວລາສະດວກຂອງແຕ່ລະບ້ານ, ແຕ່ໂດຍສ່ວນໃຫຍ່ແລ້ວ ຈະຈັດງານ ໃນຊ່ວງເດືອນທັນວາຂອງທຸກໆປີ ເພື່ອສົ່ງທ້າຍປີເກົ່າ ແລະ ຕ້ອນຮັບປີໃໝ່.
ງານດັ່ງກ່າວ ຈະໄດ້ດຳເນີນໄປເປັນເວລາ 8 ວັນ ເລີ່ມແຕ່ວັນທີ 22-29 ພະຈິກ 2017 ແລະ ມີຫລາຍກິດຈະກຳ ທີ່ໜ້າສົນໃຈ ເປັນຕົ້ນກິດຈະກຳ ໂຍນໝາກຄອນ, ການສະແດງສິລະປະວັນນະ ຄະດີພື້ນເມືອງ, ຮ້ອງເພງ, ປະກວດນາງສາວງາມເຜົ່າມົ້ງ, ວາງສະແດງສິນຄ້າຜະລິດຕະພັນຂອງປະ ຊາຊົນລາວບັນດາເຜົ່າ. ນອກນັ້ນ ຍັງມີກິດຈະກຳ ແຂ່ງຂັນກິລາບານເຕະ, ຍິງໜ້າເກັກ, ຕີໝາກຂ່າງ, ດຶງເຊືອກ, ກິລາງົວຊົນງົວ ແລະ ອື່ນໆ.