ວັນທີ 23 ພະຈິກນີ້, ກອງປະຊຸມປຶກສາຫາລືການພັດທະນາການທ່ອງທ່ຽວນິເວດຈີນ-ອາຊຽນທີ່ຈັດຂຶ້ນໂດຍກະຊວງທ່ອງທ່ຽວຟິລິປິນ ແລະສູນຈີນ-ອາຊຽນໄດ້ໄຂຂຶ້ນຢູ່ນະຄອນຫຼວງມະນີລາປະເທດຟິລິປິນ.
ທ່ານເບນີໂຕ ເບັງຊອນ ຮອງລັດຖະມົນຕີກະຊວງທ່ອງທ່ຽວຟິລິປິນກ່າວວ່າ: ປີ 2017 ແມ່ນປີສຳຄັນໃນການລົງເລິກສາຍພົວພັນ ແລະການຮ່ວມມືດ້ານການທ່ອງທ່ຽວອາຊຽນ-ຈີນ. ບັນດາປະເທດອາຊຽນກຳລັງພັດທະນາການທ່ອງທ່ຽວນິເວດ ເພື່ອຕອບສະໜອງຄວາມຕ້ອງການຂອງຕະຫຼາດການທ່ອງທ່ຽວໃນໂລກທີ່ປ່ຽນແປງຢ່າງບໍ່ຢຸດຢັ້ງ. ຈາກນີ້ຈຶ່ງຫວັງວ່າບັນດາທ່ານຈະຕັ້ງໜ້າແລກປ່ຽນປະສົບການທີ່ດີ ເພື່ອສົ່ງເສີມພັດທະນາການທ່ອງທ່ຽວນິເວດ ແລະການທ່ອງທ່ຽວແບບຍືນຍົງ ໄວ້ໃຫ້ອະນຸຊົນຮຸ່ນຫຼັງໃນຕໍ່ໜ້າ.