ວັນທີ 24 ພະຈິກນີ້, ສຸເຫຼົ່າແຫ່ງໜຶ່ງຢູ່ແຂວງຊີໄນເໜືອ ປະເທດເອຢິບ ຖືກຫຼອນໂຈມຕີກໍ່ການຮ້າຍ, ຢ່າງໜ້ອຍເຮັດໃຫ້ມີຜູ້ເສຍຊີວິດ 235 ຄົນແລ້ວ ແລະ 109 ຄົນບາດເຈັບ. ຈາກເຫດການດັ່ງກ່າວ, ທ່ານອັບເດວ ຟາຕາ ເອວ ຊີຊີ ປະທານາທິບໍດີເອຢິບ ກໍໄດ້ໄຂກອງປະຊຸມຄວາມໝັ້ນຄົງໂດຍດ່ວນ ແລະ ກ່າວປາໄສທາງໂທລະພາບວ່າ: ຈະຕ່າວໂຈມຕີອິດທິກຳລັງກໍ່ການຮ້າຍຢ່າງຮຸນແຮງ.
ຂ່າວສານຕາເວັນອອກກາງ ເຊິ່ງເປັນຂ່າວສານທາງການເອຢິບ ໄດ້ລາຍງານວ່າ: ສຸເຫຼົ່າທີ່ຖືກຫຼອນໂຈມຕີເທື່ອນີ້ ຢູ່ໄກຈາກເມືອງອານ ອາຣິສ ເທດສະບານແຂວງຊີໄນເໜືອໄປທາງທິດຕາເວັນຕົກປະມານ 80 ກິໂລແມັດ. ຈາກວີດີໂອເທິງເວັບໄຊໄດ້ເຫັນວ່າ ຄົນທັງຫຼາຍພວມອະທິຖານໃນສຸເຫຼົ່າ, ທັນໃດນັ້ນກໍເກີດລະເບີດ ແລະ ຄົນທັງຫຼາຍກໍເລີ່ມແລ່ນໜີໂດຍກະວົນກະວາຍ. ຂະນະທີ່ອົງການຮັກສາຄວາມໝັ້ນຄົງເອຢິບ ຢືນຢັນວ່າ: ຢູ່ໃນສຸເຫຼົ່າດັ່ງກ່າວມີປະມານ 500 ຄົນຂະນະເກີດລະເບີດ.
ຫຼັງເກີດເຫດ, ທຳນຽບປະທານາທິບໍດີເອຢິບ ກໍໄດ້ປະກາດວ່າ ຈະໄວ້ອາໄລຕໍ່ຜູ້ປະສົບເຄາະຮ້າຍເປັນເວລາ 3 ວັນນັບແຕ່ວັນທີ 24 ພະຈິກນີ້ເປັນຕົ້ນໄປ. ຂະນະທີ່ທ່ານຊີຊີ ປະທານາທິບໍດີເອຢິບ ກໍໄດ້ໄຂກອງປະຊຸມຄວາມໝັ້ນຄົງໂດຍດ່ວນ ເພື່ອຫາລືມາດຕະການຮັບມື ແລະ ຕ່າວໂຈມຕີ ທັງກ່າວປາໄສທາງໂທລະພາບວ່າ: ການກະທຳຕ່າງໆຂອງຜູ້ກໍ່ການຮ້າຍກໍເພື່ອສະກັດກັ້ນຄວາມພະຍາຍາມຕ້ານການກໍ່ການຮ້າຍຂອງພວກເຮົາ ແລະ ທຳລາຍມານະຈິດຂອງພວກເຮົາ. ພວກເຮົາຈະຕ້ອງໃຊ້ມາດຕະການທີ່ແຂງແຮງ ເພື່ອຟື້ນຟູຄວາມໝັ້ນຄົງແລະຄວາມສະຫງົບຂອງທ້ອງຖິ່ນໃນເວລາສັ້ນ ເຊິ່ງນີ້ກໍຄືຮູບແບບການແກ້ແຄ້ນຂອງພວກເຮົາ ພວກເຮົາຈະຕ່າວໂຈມຕີອິດທິກຳລັງກໍ່ການຮ້າຍແລະພວກຫົວຮຸນແຮງທີ່ໄດ້ກໍ່ເຫດການຫຼອນໂຈມຕີດັ່ງກ່າວນັ້ນຢ່າງຮຸນແຮງ.
ປັດຈຸບັນ ຍັງບໍ່ມີອົງການຈັດຕັ້ງ ຫຼື ບຸກຄົນໃດໆອອກມາກ່າວອ້າງຄວາມຮັບຜິດຊອບຕໍ່ເຫດການຫຼອນໂຈມຕີດັ່ງກ່າວ.