ຈາກກໍລະນີທີ່ພູໄຟອາກູງຢູ່ເກາະບາຫຼີປະເທດອິນໂດເນເຊຍໄດ້ລະເບີດອີກຄັ້ງໃໝ່ໃນຕອນບ່າຍວັນທີ 25 ພະຈິກນີ້, ສະຖານກົງສຸນໃຫຍ່ຈີນປະຈຳແດນປາຊາ ໄດ້ອອກແຈ້ງການດ່ວນທາງເວັບໄຊຕົນໃນວັນທີ 26 ເດືອນດຽວກັນເພື່ອເຕືອນພົນລະເມືອງຈີນໃຫ້ລະມັດລະວັງໃນການເດີນທາງໄປທ່ຽວເກາະດັ່ງກ່າວໃນໄລຍະນີ້.
ສູນຫຼຸດໄພພູໄຟແລະໄພທຳມະຊາດອິນໂດເນເຊຍລາຍງານວ່າ: ເວລາ 5 ໂມງ 30 ນາທີຂອງວັນທີ 25 ພະຈິກນີ້, ພູໄຟອາກູງໄດ້ພົ່ນຂີ້ເທົ່າຢ່າງຫຼວງຫຼາຍອີກຄັ້ງໃໝ່ເຊິ່ງສູງເຖິງ 1500 ແມັດແລະຕໍ່ມາ, ກໍໄດ້ພົ່ນຂີ້ເທົ່າແລະຄວັນໄຟຢ່າງຕໍ່ເນື່ອງເຊິ່ງສູງເຖິງ 4000 ແມັດທັງມີແສງສີແດງ ອາດຈະເປັນສັນຍານການພົ່ນລາວາໄດ້ທຸກເວລາ. ຂີ້ເທົ່າພູໄຟໄດ້ປິວໄປທິດຕາເວັນອອກແລະຕາເວັນອອກສຽງໃຕ້ທັງຂະຫຍາຍໄປເກາະລົມບົກຕື່ມອີກ.
ກົງສຸນຈີນປະຈີນແດນປາຊາໃຫ້ຮູ້ວ່າ: ປັດຈຸບັນ, ສະໜາມບິນສາກົນງູຣາ ລາຍ ເກາະບາຫຼີໄດ້ຍົກລະບົບເຕືອນໄພທາງອາກາດຂຶ້ນເຖິງລະດັບຂັ້ນສູງສຸດສົ່ງຜົນໃຫ້ບໍລິສັດການບິນບາງປະເທດ ໄດ້ຍົກເລີກຖ້ຽວບິນໄປເກາະບາຫຼີ.ສ່ວນລະດັບເຕືອນໄພພູໄຟຍັງຢູ່ໃນຂັ້ນສາມເໝືອນເດີມ ເຊິ່ງເປັນພຽງຮອງຈາກລະດັບສູງສຸດເທົ່ານັ້ນ.