ທ່ານເນເຊີວານ ບານຈານີ ນາຍົກລັດຖະມົນຕີເຂດປົກຄອງຕົນເອງເຄີດີສະຖານອີຣັກຢືນຢັນໃນວັນທີ 27 ພະຈິກນີ້ວ່າ: ຍິນດີເຈລະຈາກັບລັດຖະບານຢ່າງຈິງໃຈເພື່ອແກ້ໄຂຂໍ້ຂັດແຍ້ງລະຫວ່າງສອງຝ່າຍ.
ຫຼັງສານສູງສຸດອີຣັກໄດ້ອອກຄຳຕັດສິນວ່າການລົງປະຊາມະຕິແຍກເປັນເອກະລາດທີ່ເຂດເຄີດີສະຖານຈັດຂຶ້ນກ່ອນໜ້ານີ້ເປັນການລະເມີດລັດຖະທຳມະນູນ ທັງປະກາດຍົກເລີກຜົນ ການລົງປະຊາມະຕິດັ່ງກ່າວຢ່າງສິ້ນເຊິ່ງໃນວັນທີ 20 ພະຈິກນີ້. ທ່ານບານຈານີກໍໄດ້ກ່າວໃນການຖະແຫຼງຂ່າວທີ່ຈັດຂຶ້ນຢູ່ເອີບິນໃນວັນທີ 27 ພະຈິກນີ້ວ່າ: ຕາມຄຳຕັດສິນຂອງສານສູງສຸດອີຣັກ, ລັດຖະບານຄວນຍົກເລີກທຸກມາດຕະການຕອບໂຕ້ທີ່ແນໃສ່ການລົງປະຊາມະຕິເພື່ອແຍກເປັນເອກະລາດຂອງເຂດເຄີດີສະຖານ.
ວັນທີ 25 ກັນຍາຜ່ານມາ, ເຂດປົກຄອງຕົນເອງເຄີດີສະຖານໄດ້ຈັດການລົງປະຊາມະຕິເພື່ອແຍກເປັນເອກະລາດໂດຍບໍ່ຫົວຊາຕໍ່ການຄັດຄ້ານຈາກຝ່າຍຕ່າງໆ. ຂະນະທີ່ລັດຖະບານອີຣັກກໍໄດ້ຕຳໜິຫຼາຍເທື່ອວ່າການລົງປະຊາມະຕິຂອງເຂດເຄີດີສະຖານເປັນການລະເມີດລັດຖະທຳມະນູນທັງຢືນຢັນຫຼາຍເທື່ອແລ້ວວ່າ ການຍົກເລີກຜົນການລົງປະຊາມະຕິຂອງເຂດເຄີດີສະຖານເປັນເງື່ອນໄຂເບື້ອງຕົ້ນໃນການດຳເນີນການເຈລະຈາລະຫວ່າງສອງຝ່າຍ.