ອົງການຕ້ານໄພພິບັດອິນໂດເນເຊຍເປີດເຜີຍໃນວັນທີ 28 ພະຈິກນີ້ວ່າ: ຫຼາຍມື້ຜ່ານມາ,ຢູ່ແຂວງຊາວາຕາເວັນອອກອິນໂດເນເຊຍໄດ້ເກີດ ຝົນຕົກໜັກແລະລົມພັດແຮງສົ່ງຜົນເຮັດໃຫ້ເກີດພູເຈື່ອນແລະນ້ຳຖ້ວມ ເຊິ່ງສະພາບດັ່ງກ່າວເຮັດໃຫ້ຢ່າງໜ້ອຍມີຜູ້ເສຍຊີວິດ 11 ຄົນ, ເຮືອນຫຼາຍພັນຫຼັງຖືກຖ້ວມ.
ທ່ານຊູໂຕໂປ ໂຄສົກອົງການຕ້ານໄພພິບັດອິນໂດເນເຊຍຖະແຫຼງວ່າ: ຕອນຮຸ່ງເຊົ້າວັນທີ 28 ພະຈິກນີ້, ພູໜ່ວຍໜຶ່ງຢູ່ເມືອງປາຊີຕັນແຂວງຊາວາຕາເວັນອອກໄດ້ເຈື່ອນ ເຮັດໃຫ້ປະຊາຊົນ 9 ຄົນຖືກຖົມເສຍຊີວິດ. ນອກນີ້, ຍັງມີອີກ 2 ຄົນເສຍຊີວິດຈາກນ້ຳຖ້ວມ. ປັດຈຸບັນ, ແຂວງດັ່ງກ່າວຍັງຕ້ອງໄດ້ຍົກຍ້າຍປະຊາຊົນປະມານ 4000 ຄົນທີ່ໄດ້ຮັບຜົນກະທົບຈາກໄພພິບັດໄປສູ່ບ່ອນປອດໄພ. ທ່ານຊູໂຕໂປຢືນຢັນວ່າ ພາຍຸໄຊໂຄລນ "ເຊັມປາຄາ"ພັດເຂົ້າພາກໃຕ້ເກາະຊາວາຢ່າງຮຸນແຮງ ເຊິ່ງເຮັດໃຫ້ເກີດຝົນຕົກໜັກແລະລົມພັດແຮງ. ນອກຈາກເມືອງປາຊີຕັນແລ້ວ, ຍັງມີອີກ 20 ເມືອງໄດ້ຮັບຜົນເສຍຫາຍເຊັ່ນດຽວກັນ.
ແຕ່ເດືອນ ພະຈິກ ຫາເດືອນເມສາ ເປັນລະດູຝົນຂອງອິນໂດເນເຊຍ ທັງເປັນໄລຍະທີ່ມັກເກີດ ພູເຈື່ອນແລະ ນ້ຳຖ້ວມເລື້ອຍໆ.
