ວັນທີ 28 ພະຈິກນີ້ ຢູ່ນະຄອນຫຼວງປາລີຝຣັ່ງ, ອົງການຮ່ວມມືເສດຖະກິດ ແລະການພັດທະນາໂລກໄດ້ເປີດເຜີຍບົດລາຍງານຄວາມຄາດຫວັງຂອງເສດຖະກິດໂລກ ເຊິ່ງໄດ້ປັບຈັງຫວະການເຕີບໂຕສູງຂຶ້ນໃນປີ 2017.
ບົດລາຍງານຄາດວ່າ: ຈັງຫວະການເຕີບໂຕຂອງເສດຖະກິດໂລກໃນປີ 2017 ຈະບັນລຸເຖິງ 3,6% ເຊິ່ງປັບຂຶ້ນ 0,1% ເມື່ອທຽບໃສ່ເດືອນກັນຍາຜ່ານມາ ຂະນະທີ່ລະດັບຄາດຫວັງສຳລັບປີ 2018 ຍັງຢູ່ໃນລະດັບ 3,7% ຄືເກົ່າ.
ບົດລາຍງານດັ່ງກ່າວຍັງໄດ້ຍົກຈັງຫວະການເຕີບໂຕຂອງກຸ່ມເສດຖະກິດພັດທະນາແລ້ວໃນປີ 2017 ແລະ 2018 ຄື ອາເມລິກາ ແລະເຂດໃຊ້ເງິນເອີໂຣສູງຂຶ້ນ, ແຕ່ຫຼຸດຄາດໝາຍຂອງເສດຖະກິດຍີ່ປຸ່ນ ແລະອັງກິດລົງ. ສຳລັບຄາດໝາຍຕໍ່ກຸ່ມເສດຖະກິດພັດທະນາໃໝ່ ຄື ອິນເດຍ, ລັດເຊຍ, ເບຼຊິນ ແລະອື່ນໆກໍແຕກຕ່າງກັນ.
ແນວໃດກໍດີ, ສິ່ງທີ່ໜ້າສົນໃຈກໍຄື ອົງການຮ່ວມມືເສດຖະກິດ ແລະການພັດທະນາຄາດວ່າ ໃນປີ 2019 ຈັງຫວະການເຕີບໂຕຂອງກຸ່ມເສດຖະກິດຕົ້ນຕໍຕ່າງໆຈະຫຼຸດລົງ, ຂະນະທີ່ຈັງຫວະການເຕີບໂຕຂອງໂລກຈະຢູ່ໃນລະດັບ 3,6%.