ຄາດ​ວ່າເດືອນ​ນີ້ກຳ​ແພງ​ນະ​ຄອນ​ຈຸ່ງ​ກິ່ງ​​ຈະ​ນຳ​ເຂົ້າ​ກຸ້ງ​ເປັນ​ຈາກ​ໄທ​ເພີ່ມ​ຂຶ້ນ​ເຖິງ 5 ໂຕ​​ນ
2017-12-01 16:37:11  cri 
ພະ​ແນກກວດ​ກາ​ແລະ​ກັກ​ກັນ​ພະ​ຍາດ​ເຂົ້າ​ອອກ​ເມືອງ​ກຳ​ແພ​ງ​ນະ​ຄອນ​ຈຸ່ງ​ກິ່ງ ສ​ປ ຈີນ​ເປີດ​ເຜີຍ​ໃນ​ວັນ​ທີ 30 ພະ​ຈິກ​ຜ່ານ​ມາ​ວ່າ: ເລີ່ມ​ແຕ່​ວັນ​ທີ 1 ທັນ​ວາ​ນີ້​ເປັນ​ຕົ້ນ​ໄປ, ຈຸ່ງ​ກິ່ງ​ຈະ​ນຳ​ເຂົ້າ​ກຸ້ງ​ຈາກ​ໄທ​ເພີ່ມ​ຂຶ້ນ​ເຖິງ 5 ໂຕນ​ຕໍ່​ເດືອນເຊິ່ງຖື​ວ່າ​​ເປັນ​ການ​ນຳ​ເຂົ້າ​ກຸ້ງ​ເປັນ​ຈາກ​ໄທຫຼາຍ​ທີ່​ສຸດຫຼັງ​ກຳ​ແພງ​ນະ​ຄອນ​ຈຸ່ງ​ກິ່ງ​ໄດ້​ຮັບ​ຮອງ​ເປັນ​ດ່ານ​ສະ​ເພາະ​ນຳ​ເຂົ້າ​ສັດ​ໃນ​ນ້ຳ​ທີ່​ເປັນ​ອາ​ຫານ.

​ເມື່ອເດືອນ​ກັນ​ຍາ​ຜ່ານ​ມາ, ກຸ້ງ​ເສືອ​ຈາກ​ເກາະ​ພູ​ເກັດ​ໄທ​ແລະ​ກຸ້ງ​ຂາວ​ໃຫຍ່​ຈາກ​ອາ​ເມ​ລິ​ກາ​ລາ​ຕິນ​ໄດ້​ເຂົ້າ​ສູ່​ຕະຫຼາດ​ຈຸ່ງ​ກິ່ງ​ເປັນ​ຄັ້ງ​ທຳ​ອິດ​ແລະເນື່ອງ​ຈາກ​ດ່ານ​ພາ​ສີ​ໃນ​ທົ່ວ​ນະ​ຄອນ​ຈຸ່ງ​ກິ່ງ​ໄດ້​ເປີດ​ບໍ​ລິ​ການ​ຕະຫຼອດ 24 ຊົ່ວ​ໂມງບໍ່​ເວັ້ນ​ວັນ​ລັດ​ຖະ​ການ, ​ການ​ນຳ​ເຂົ້າກຸ້ງ​ເປັນ​ຈາກ​ໄທ​ສູ່​ຈຸ່ງ​ກິ່ງ​ຈະ​ໃຊ້​ເວ​ລາ​ພຽງ​ແຕ່ 10 ຊົ່ວ​ໂມງ​ເທົ່າ​ນັ້ນ.

ຜູ້​ອຳ​ນວຍ​ການ​ໃຫຍ່ບໍ​ລິ​ສັດ​ການ​ຄ້າ​ຂາ​ເຂົ້າ​ຂາ​ອອກ​ໄທ​ອ້າຍ​ນີ​ຈຸ່ງ​ກິ່ງ​ຈຳ​ກັດ​ໃຫ້​ຮູ້​ວ່າ: ຊຸມ​ປີ​ມໍ່ໆ​ມາ​ນີ້, ຜູ້​ບໍ​ລິ​ໂພກ​ມັກ​ຊື້​ກຸ້ງ​ເປັນ​ທີ່​ນຳ​ເຂົ້າ​ຈາກ​ໄທ​ນັບ​ມື້ຫຼາຍ​ຂຶ້ນ.​ແນວ​ໃດ​ກໍ​ດີບໍ່​ສ​ະ​ເພາະ​ແຕ່​ຈຸ່ງ​ກິ່​ງ​ເທົ່າ​ນັ້ນ, ຢູ່​ຕະຫຼາດ​ຂອງ​ນະ​ຄອນ​ເສິງ​ຕູ່​ກໍ​ມີ​ກຸ້ງ​ເປັນ​ໄທ​ນັບ​ມື້ຫຼາຍ​ຂຶ້ນ​ເຊັ່ນ​ກັນ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ