​ທ່ານສີຈິ້ນຜິງ​ເນັ້ນ​ພັ​ກກອມ​ມູ​ນິດ​ຈີນ​ຍິນ​ດີ​ຮ່ວມ​ກັບ​ເພື່ອນ​ມິດ​ຝ່າຍ​ຕ່າງໆ​ເພື່ອ​ສ້າງ​ໂລກ​ທີ່​ສວຍ​ງາມກວ່າ​ເກົ່າ
2017-12-02 08:48:11  cri 


ວັນທີ 1 ທັນວານີ້ ​ທ່ານສີຈິ້ນຜິງ ເລຂາທິການໃຫຍ່ ຄະນະກຳມະການ ສູນກາງ ພັກກອມມູນິດຈີນ ປະທານປະເທດ ສປ ຈີນ ໄດ້ເຂົ້າຮ່ວມພິ​ທີ​ເປີດກອງ​ປະ​ຊຸມສຳມະນາລະດັບສູງລະຫວ່າງພັກກອມມູນິດຈີນແລະພັກການເມືອງໃນທົ່ວໂລກທີ່ຈັດ​ຂຶ້ນ​ຢູ່ຫໍສະພາປະຊາຊົນແຫ່ງຊາດຈີນ​ທີ່ນະ​ຄອນຫຼວງ​ປັກ​ກິ່ງ ແລະກ່າວສູນທອນພົດທີ່ພາດຫົວເລື່ອງວ່າ: ຮ່ວມກັນສ້າງໂລກທີ່ສວຍງາມກວ່າເກົ່າ ໂດຍກ່າວເນັ້ນວ່າ, ພັກການເມືອງຄວນພັດ​ທະ​ນາ​ໄປຕາມກະແສຂອງຍຸກສະໄໝ, ກຳກັບທິດ​ກ້າວ​ເດີນຂອງມວນມະນຸດ, ເຮັດວຽກເພື່ອຄວາມປາຖະໜາຮ່ວມຂອງປະຊາຊົນ, ມີອຸດົມການອັນສູງສົ່ງ ແລະກ້າຮັບພາລະໜ້າທີ່, ເປັນເຈົ້າການຮັບໜ້າທີ່ແຫ່ງຍຸກສະໄໝ. ພັກກອມມູນິດຈີນຈະເຮັດຄືແຕ່​ເກົ່າ​ເມືອຫຼັງ, ສືບຕໍ່ປະກອບສ່ວນ ເພື່ອສັນຕິພາບ, ຄວາມສະຫງົບ,  ການພັດທະນາຮ່ວມກັນຂອງໂລກ ແລະເຮັດໃຫ້ອາລິຍະທຳຕ່າງໆ​ໃນ​ໂລກ​ຖອດ​ຖອນ​ບົດ​ຮຽນ​ເຊິ່ງ​ກັນ​ແລະກັນ. 
 


ຕອນ​ບ່າຍ​ວັນ​ທີ 1 ທັນ​ວາ​ນີ້, ​ພາຍຫຼັງ​ຕ້ອນ​ຮັບ​ການ​ເຂົ້າ​ຢ້ຽມ​ຄຳ​ນັບ​ຂອງ​ ທ່ານນາງອອງຊານຊູຈີ ທີ່ປຶກສາແຫ່ງລັດມຽນມາ, ທ່ານຮຸນແຊນ ປະທານພັກປະຊາຊົນກຳປູເຈຍ ນາຍົກລັດຖະມົນຕີກຳປູເຈຍທີ່​ມາ​ເຂົ້າ​ຮ່ວມ​ກອງ​ປະ​ຊຸມສຳມະນາລະດັບສູງລະຫວ່າງພັກກອມມູນິດຈີນແລະພັກການເມືອງ ໃນທົ່ວໂລກ​ຢູ່​ຈີນ, ​ທ່ານ​ສີ​ຈິ້ນ​ຜິງ​ໄດ້​ເຂົ້າ​ຮ່ວມ​ພິ​ທີ​ໄຂ​ກອງ​ປະ​ຊຸມສຳ​ມະ​ນາ ແລະ​ກ່າວ​ສູນ​ທອນ​ພົດ.

ທ່ານ​ສີ​ຈິ້ນ​ຜິງ​ຊີ້​ອອກວ່າ, ໃນ​ຊູ່​ມື້​ນີ້, ມວນ​ມະ​ນຸດ​ມີ​ສາຍ​​ພົວ​ພັນ​ທີ່​ໃກ້​ຊິດ​ຢ່າງ​ບໍ່​ເຄີຍ​ມີ​ມາ​ກ່ອນ, ພ້ອມ​ກັນ​ນັ້ນ​ກໍ​ຜະ​ເຊີນ​ໜ້າ​ກັບຫຼາຍ​ບັນ​ຫາ​ລັກ​ສະ​ນະ​ທົ່ວ​ໂລກ​ຢ່າງ​ບໍ່​ເຄີຍ​ມີ​ມາ​ກ່ອນ. ປະ​ຊາ​ຊົນ​ບັນ​ດາ​ປະ​ເທດ​ໃນ​ໂລກ​ຄວນ​ຖື​ທັດ​ສະ​ນະ "ທົ່ວ​ໂລກ​ເປັນ​ຄອບ​ຄົວ​ດຽວ​ກັນ" ໂດຍ​ເຂົ້າ​ໃຈ​ເຊິ່ງ​ກັນ​ແລະ​ກັນ, ສະ​ແຫວງ​ຫາ​ສິ່ງ​ທີ່​ຄື​ກັນ​ແລະສະ​ຫງວນ​ສິ່ງ​ທີ່​​ຕ່າງ​ກັນ, ​ພະ​ຍາ​ຍາມ​ຮ່ວມ​ກັນ​ເພື່ອ​ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳ​ຂອງມວນ​ມະ​ນຸດ. ທ່ານ​ກ່າວ​ວ່າ "ປີ 2013, ຂ້​າ​ພະ​ເຈົ້າ​ໄດ້​ວາງ​ຂໍ້​ລິ​ເລີ່ມ ສ້າງ​ປະ​ຊາມ​ຄົມ​ຮ່ວມ​ຊາ​ຕາ​ກຳ​ມວນ​ມະ​ນຸດ​ເປັນ​ຄັ້ງ​ທຳ​ອິດ. ຂ້າ​ພະ​ເຈົ້າ​ຮູ້​ສຶກ​ດີ​ໃຈ​ທີ່​ໄດ້​ເຫັນ​ວ່າ, ການ​ຮ່ວມ​ມື​ໄມ​ຕີ​ຈິດ​ມິ​ດ​ຕະ​ພາບ​ລະ​ຫວ່າງ​ຈີນ​ກັບ​ບັນ​ດາ​ປະ​ເທດ​ໃນ​ໂລກ​ໄດ້​ຂະ​ຫຍາຍກວ້າງ​ອອກ​ຢ່າງ​ບໍ່​ຢຸດ​ຢັ້ງ, ທັດ​ສະ​ນະ​ປະ​ຊາ​ຄົມ​ຮ່ວມ​ຊາ​ຕາ​ກຳ​ມວນ​ມະ​ນຸດ​ໄດ້​ຮັບ​ການ​ສະ​ໜັບ​ສະ​ໜູນ ແລະ​ ຮັບ​ຄວາມ​ເຫັນ​ດີ​ເຫັນ​ພ້ອມ​ນັບ​ມື້​ເພີ່ມ​ຂຶ້ນ ເຊິ່ງ​ຂໍ້​ລິ​ເລີ່ມ​ດັ່ງ​ກ່າວ​ໄດ້​ຫັນ​ຈາກ​ທັດ​ສະ​ນະ​ໃຫ້​ເປັນ​ຮູບ​ປະ​ທຳ. ຂ້າ​ພະ​ເຈົ້າ​ສະ​ເໜີ​ຂໍ້​ລິ​ເລີ່ມ ໜຶ່ງ​ແລວ​ທ​າງ​ໜຶ່ງ​ເສັ້ນ​ທາງ, ກໍ​ແມ່ນ​ເພື່ອ​ປະ​ຕິ​ບັດຕາມ​ທັດ​ສະ​ນະ​ປະ​ຊາ​ຄົມ​ຮ່ວມ​ຊາ​ຕາ​ກຳ​ມວນ​ມະ​ນຸດ. ໃນ 4 ປີ​ຜ່ານ​ມາ, ຮ່ວມ​ກັນ​ສ້າງ​ ໜຶ່ງ​ແລວ​ທາງ​ໜຶ່ງ​ເສັ້ນ​ທາງ ໄດ້​ກາຍ​ເປັນ​ເວ​ທີ​ຮ່ວມ​ມື​ທີ່ກວ້າງ​ຂວາງ​ສຳ​ລັບປະ​ເທດ​ຕ່າງໆ​ທີ່​ກ່ຽວ​ຂ້ອງ​ພັດ​ທະ​ນາ​ຮ່ວມ​ກັນ. ຂ້າ​ພະ​ເຈົ້າ​ເຊື່ອ​ໝັ້ນ​ວ່າ, ຝ່າຍ​ຕ່າງໆຍຶດ​ໝັ້ນທັດ​ນະ​ນະປະ​ຊາ​ຄົມ​ຮ່ວມ​ຊາ​ຕາ​ກຳ​ມວນ​ມະ​ນຸດ, ຮ່ວມ​ກັນ​ວາງ​ແຜນ​ການ ແລະ​ປະ​ຕິ​ບັດ​ຕົວ​ຈິງ, ທຳ​ຄວາມ​ພະ​ຍາ​ຍາມ​​ຢ່າງ​ບໍ່​ລົດ​ລະ​ເປັນ​ເວ​ລາ​ຍາວ​ນານ, ​ກ້າວ​ໄປ​ໜ້າ​ເທື່ອ​ລະ​ກ້າວ, ເປົ້າ​ໝາຍ​ທີ່​ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳ​ມວນ​ມະ​ນຸດ​ນັ້ນ​ຈະ​ບັນ​ລຸ​ຜົນ​ເປັນ​ຈິງ​ຢ່າງ​ແນ່ນອນ."
 
ທ່ານ​ສີ​ຈິ້ນ​ຜິງ​ກ່າວ​ຕື່ມ​ວ່າ, ປັດ​ຈຸ​ບັນ, ສະ​ຖາ​ນະ​ການ​ສາ​ກົນ​ພວມ​ມີ​ການ​ປ່ຽນ​ແປງ, ໂຄງ​ປະ​ກອບ​ການ​ພັດ​ທະ​ນາ​ກໍ​ພວມ​ມີ​ການ​ປ່ຽນ​ແປງຄື​ກັນ. ພັກການເມືອງຂອງປະເທດຕ່າງໆຄວນເພີ່ມຄວາມໄວ້ເນື້ອເຊື່ອໃຈກັນ,ທຳຄວາດ ເຂົ້າໃຈກັນຫຼາຍຂຶ້ນ, ປະສານງານກັນ​ຢ່າງແໜ້ນແຟ້ນກວ່າ​ເກົ່າ, ​ຄົ້ນ​ຄວ້າສ້າງການພົວພັນລະຫວ່າງພັກການເມືອງແບບໃໝ່ທີ່ສະແຫວງຫາສິ່ງທີ່ຄືກັນ ແບະ ສະຫງວນສິ່ງທີ່ຕ່າງກັນ, ຕ່າງເຄົາລົບກັນ, ຖອດຖອນບົດ​ຮຽນເຊິ່ງກັນ ແລະກັນ ບົນພື້ນຖານການພົວພັນສາກົນແບບໃໝ່, ເພື່ອສ້າງເປັນເຄືອຂ່າຍ ການແລກປ່ຽນ ແລະ ຮ່ວມມືກັນລະຫວ່າງພັກການເມືອງສາກົນ ທີ່ມີຫຼາກຫຼາຍຮູບແບບ ແລະ ຫຼາຍລະດັບ​ ບົນ​ພື້ນ​ຖານ​ສາຍ​ພົວ​ພັນ​ສາ​ກົນ​ແບບ​ໃໝ່, ເຕົ້າ​ໂຮມກຳລັງແຂງແຮງເພື່ອສ້າງເປັນປະຊາຄົມຮ່ວມຊາຕາກຳ. ທ່ານ​ກ່າວ​ເນັ້ນ​ວ່າ, "ພັກ​ກອມ​ມູ​ນິ​ດ​ຈີນ​ເປັນ​ພັກ​ການ​ເມືອງ​ທີ່​ສະ​ແຫວງ​ຫາ​ຄວາມ​ສຸກ​​ໃຫ້​ແກ່ປະ​ຊາ​ຊົນ​ຈີນ, ກໍ​ແມ່ນ​ພັກ​ການ​ເມືອງ​ທີ່​ບາກ​ບັ່ນ​ສູ້​ຊົນ​ເພື່ອ​ພາ​ລະ​ກິດ​ກ້າວ​ໜ້າ​ຂອງມວນ​ມະ​ນຸດ. ພັກ​ກອມ​ມູ​ນິດ​ຈີນ​ເຮັດ​ວຽກ​ທຸກ​ຢ່າງ ແມ່ນ​ເພື່ອ​ສະ​ແຫວງ​ຫາ​ຄວາມ​ສຸກ​ໃຫ້​ແກ່​ປະ​ຊາ​ຊົນ​ຈີນ, ​ພະ​ຍາ​ຍາມ​ຟື້ນ​ຟູ​ຄວາມ​ຈະ​ເລີນ​ຮຸ່ງ​ເຮືອງ​ຂອງ​ປະ​ຊ​າ​ຊາດ​ຈີນ, ສະ​ແຫວງ​ຫາ​ສັນ​ຕິ​ພາບ ແລະ​ການ​ພັດ​ທະ​ນາ​ຂອງມວນ​ມະ​ນຸດ. ພວກ​ເຮົາຈະ​ເຮັດ​ວຽກ​ຂອງ​ຕົ​ນ​ໃຫ້​ດີ ເຊິ່ງເປັນ​ການ​ປະ​ກອບ​ສ່ວນ​ເຂົ້າ​ໃນ​ການ​ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳ​ຂອງມວນ​ມະ​ນຸດ. ພວກ​​ເຮົາກໍ​ຈະ​ຜ່ານ​​ຈາກການ​ພັດ​ທະ​ນາ​ຂອງ​ຈີນ ​ເພື່ອ​ສ້າງ​ໂອ​ກາດຫຼາຍກວ່າ​ເກົ່າ​ໃຫ້​ແກ່​ໂລກ ໂດຍຜ່ານ​ການ​ລົງ​ເລິກ​ພຶດ​ຕິ​ກຳ​ຂອງ​ຕົນ​ເພື່ອ​ຄົ້ນ​ຄວ້າ​ກົດ​ເກນ​ພັດ​ທະ​ນາ​ຂອງ​ສັງ​ຄົມ​ມະ​ນຸດ​ ແລະ ຊົມ​ໃຊ້​ຮ່ວມກັບ​ປະ​ເທດ​ຕ່າງໆ​ໃນ​ໂລກ. ພວກເຮົາຈະບໍ່​ລອກ​ແບບຮູບການພັດທະນາຂອງຕ່າງປະເທດ, ແລະບໍ່​ບັງ​ຄັບ​ໃຫ້​​ປະ​ເທດ​ອື່ນລອກ​ແບບຮູບການພັດທະນາຂອງຈີນ, ພັກ​ກອມ​ມູ​ນິດ​ຈີນ​ຈະເຮັດ​ຄື​ແຕ່​ເກົ່າ​ເມືອຫຼັງ, ​​ປະ​ກອບ​ສ່ວນ​ເຂົ້າ​ໃນ​​ການ​ຮັກ​ສາສັນ​ຕິ​ພາບ ແລະ​ຄວາມ​ໝັ້ນ​ຄົງ​ຂອງ​ໂລກຢ່າງ​ສະ​ເໝີ​ຕົ້ນ​ສະ​ເໝີ​ປາຍ, ​​ປະ​ກອບ​ສ່ວນ​ເຂົ້າ​ໃນ​​ການ​ພັດ​ທະ​ນາ​ຮ່ວມ​ກັນ​ຂອງ​ໂລກຢ່າງ​ສະ​ເໝີ​ຕົ້ນ​ສະ​ເໝີ​ປາຍ, ແລະ​ປະ​ກອບ​ສ່ວນ​ເຂົ້າ​ໃນ​ການ​ແລກ​ປ່ຽນ ແລະ​ຖອດ​ຖອນ​ບົດ​ຮຽນ​ເຊິ່ງ​ກັນ​ ແລະ​ກັນ ລະ​ຫວ່າງ​ອະ​ລິ​ຍະ​ທຳ​ຕ່າງໆ​ໃນ​ໂລກ​ຢ່າງ​ສະ​ເໝີ​ຕົ້ນ​ສະ​ເໝີ​ປາຍ.
 
ທ່ານ​ສີ​ຈິ້ນ​ຜິງ​ຊີ້​ອອກວ່າ, ໃນ 5 ປີ​ຕໍ່​ໜ້າ​ນີ້, ພັກ​ກອມ​ມູ​ນິດ​ຈີນ​ຍັງ​ຈະ​ໃຫ້​ໂກ​ຕາແກ່​ພະ​ນັກ​ງານ 15000 ຄົນ​ຂອງ​ພັກ​ການ​ເມືອງ​ປະ​ເທດຕ່າງໆ​​ໃນໂລກ​ມາ​ສຶກ​ສາ​ຄົ້ນ​ຄວ້າ ແລະ ຖອດ​ຖອນ​ບົດ​ຮຽນ​ຢູ່​ຈີນ. ທ່ານ​ຍັງ​ລິ​ເລີ່ມ​ໃຫ້​ກອງ​ປະ​ຊຸມສຳມະນາລະດັບສູງລະຫວ່າງພັກກອມມູນິດຈີນແລະພັກການເມືອງໃນທົ່ວໂລກ​ໃຫ້​​ກາຍເປັນ​ກົນ​ໄກ​ປະ​ຈຳ ແລະ ກາຍ​ເປັນ​ເວ​ທີ​ສົນ​ທະ​ນາ​ທາງການ​ເມືອງ​ລະ​ດັບ​ສູງ​ທີ່​ມີ​ລັກ​ສ​ະ​ນະ​​ຕາງ​ໜ້າ​ຢ່າງກວ້າງ​ຂວາງ ແລະ​ມີ​ອິດ​ທິ​ພົນ​ສາ​ກົນ.
 
​ທ່ານ​ກ່າວ​ວ່າ, ໃນ​ໄລ​ຍະດົນ​ນານ​ມາ​ນີ້, ພັກ​ກອມ​ມູ​ນິດ​ຈີນ​ໄດ້​ຮັກ​ສາ​ການ​ພົວ​ພັນ​ເປັນ​ປະ​ຈຳ​ກັບ 400 ກວ່າ​ພັກ​ການ​ເມືອງ ແລະ​ ອົງ​ການ​ຈັດ​ຕັ້ງ​ການ​ເມືອງ ຂອງ 160 ກວ່າ​ປະ​ເທດ ແລະ ​ເຂດ​ແຄວ້ນ​ໃນ​ໂລກ ໂດຍ​ມຸ່ງ​ໜ້າ​ສູ່​ອະ​ນາ​ຄົດ, ພັກ​ກອມ​ມູ​ນິດ​ຈີນ​ຍິນ​ດີ​ຮ່ວມ​ກັບ​ພັກ​ການ​ເມືອງ​ຕ່າງໆ​ໃນ​ໂລກ​ເພີ່ມ​ທະ​ວີ​ການ​ໄປ​ມາ​ຫາ​ສູ່​ກັນ, ຖອດ​ຖອນບົດ​ຮຽນ​ດ້ານ​ການ​ຄຸ້ມ​ຄອງ​ພັກ ແລະ ​ປົກ​ຄອງ​ປະ​ເທດ, ດຳ​ເນີນ​ການ​ສົນ​ທະ​ນາ​ລະ​ຫວ່າງ​ອະ​ລິ​ຍະ​ທຳ​ຕ່າງໆ, ເພີ່ມ​​ຄວາມ​ໄວ້​ເນື້ອ​ເຊື່ອ​ໃຈ​ດ້ານ​ການ​ເມືອງ, ຮ່ວມ​ກັບ​ປະ​ຊາ​ຊົນ​ທົ່ວ​ໂລກ, ຊຸກ​ຍູ້​ສ້າງ​​ປະ​ຊາ​ຄົມ​ຮ່ວມ​ຊາ​ຕາ​ກຳ​ມວນ​ມະ​ນຸດ, ຮ່ວມ​ກັນ​ສ້າງ​ໂລກ​ທີ່​ສວຍ​ງາມກວ່າ​ເກົ່າ.
 
ຫຼັງ​ພິ​ທີ​ໄຂ​ກອງ​ປະ​ຊຸມ​ຍັງໄດ້​ຈັດ​ກອງ​ປະ​ຊຸມ​ຄົບ​ຄະ​ນະ​ຄັ້ງ​ທຳ​ອິດ, ຜູ້​ນຳ​ພັກ​ການ​ເມືອງ​ຫຼາຍ​ປະ​ເທດ​ໄດ້​ກ່າວ​ປາ​ຖະ​ກະ​ຖາ ໂດຍ​ຕີ​ລາ​ຄາ​ສູງ​ຕໍ່​​ຂໍ້​ສະ​ເໜີ​ຂອງ​ທ່ານ​ສີ​ຈິ້ນ​ຜິງ​ກ່ຽວ​ກັບການ​ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳ​ຂອງມວນ​ມະ​ນຸດ ແລະ​ຮ່ວມ​​ກັນ​ສ້າງ​ໂລກ​ທີ່​ສວຍ​ງາມກວ່າ​ເກົ່າ ທັງ​ກ່າວ​ວ່າ​ຈະ​ຮ່ວມ​ກັບ​ພັກ​ກອມ​ມູ​ນິດ​ຈີນ, ຮ່ວມ​ກັນ​ສ້າງ​​ໂລກ​ທີ່​ມີ​ສັນ​ຕິ​ພາບ​ຖາ​ວອນ, ມີ​ຄວາມ​ໝັ້ນ​ຄົງ​ທົ່ວ​ໄປ, ຈະ​ເລີນ​ຮຸ່ງ​ເຮືອງ​ຮ່ວມ​ກັນ, ເປີດ​ປະ​ຕູ​ສູ່​ພາຍນອກ, ໂອບ​ອ້ອມ​ອາ​ລີ, ສະ​ອາດ ແລະ​ສວຍ​ງາມ.
 
ກອງ​ປະ​ຊຸມສຳມະນາລະດັບສູງລະຫວ່າງພັກກອມມູນິດຈີນແລະພັກ ການເມືອງໃນທົ່ວໂລກທີ່​ດຳ​ເນີນ​ເປັນ​ເວ​ລາ 4 ​ວັນ ເຊິ່ງ​ມີ​ຫົວ​ຂໍ້​ວ່າ "ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳ​ມວນ​ມະ​ນຸດ, ຮ່ວມ​ກັນ​ສ້າງ​ໂລກ​ທີ່​ສວຍ​ງາມ: ຄວາມ​ຮັບ​ຜິດ​ຊອບ​ຂອງ​ພັກ​ການ​ເມືອງ", ຜູ້​ນຳ​ 600 ກວ່າ​ທ່ານ​ຂອງເກືອບ300 ​ພັກ​ການ​ເມືອງ ແລະ​ອົງ​ການ​ຈັດ​ຕັ້ງ​ການ​ເມືອງຈາກ 120 ກວ່າ​ປະ​ເທດໄດ້​ເຂົ້າ​ຮ່ວມກອງ​ປະ​ຊຸມ.
 
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ