ຕອນບ່າຍວັນທີ 1 ທັນວານີ້ ຕາມເວລາທ້ອງຖິ່ນ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສະພາມົນຕີນາຍົກລັດຖະມົນຕີປະເທດສະມາຊິກອົງການຮ່ວມມືຊຽງໄຮຄັ້ງທີ 16 ທີ່ຈັດຂຶ້ນຢູ່ເມືອງຊອກຊີ ປະເທດຣັດເຊຍ.ທ່ານດີມີຕຣີ ເມັດເວເດັຟ ນາຍົກລັດຖະມົນຕີຣັດເຊຍ, ທ່ານບາຄິສຊານ ຊາກິນຕາເຢັຟ ນາຍົກລັດຖະມົນຕີກາຊັກສະຖານ, ທ່ານຊາປາ ອິຊາຄົຟ ນາຍົກລັດຖະມົນຕີກຽກກີສະຖານ, ທ່ານໂຄເຄຍ ຣາຊູນໂຈດາ ນາຍົກລັດຖະມົນຕີຕາຊີກີສະຖານ, ທ່ານອັບດູນລາ ອາຣິໂປຟ ນາຍົກລັດຖະມົນຕີອຸສເບກີສະຖານ, ທ່ານຊາຣິດ ຄາການ ອັບບາຊີ ນາຍົກລັດຖະມົນຕີປາກີສະຖານແລະຜູ້ຕາງໜ້າລັດຖະບານອິນເດຍໄດ້ເຂົ້າຮ່ວມກອງປະຊຸມດັ່ງກ່າວ.
ທ່ານຫຼີເຄີ້ສຽງຢືນຢັນໃນເວລາປະກອບຄຳຄິດເຫັນຢູ່ກອງປະຊຸມວ່າ: ນັບແຕ່ອົງການຮ່ວມມືຊຽງໄຮສ້າງຕັ້ງຂຶ້ນເປັນເວລາ 16 ປີມານີ້, ປະເທດສະມາຊິກຕ່າງໆໄດ້ເດັດດ່ຽວຍຶດໝັ້ນເຄົາລົບແລະປະຕິບັດຕາມ "ຈິດໃຈຊຽງໄຮ"ທີ່ໄວ້ເນື້ອເຊື່ອໃຈກັນ, ຕ່າງຝ່າຍຕ່າງມີຜົນປະໂຫຍດ,ສະເໝີພາບກັນ,ປຶກສາຫາລືກັນ, ເຄົາລົບຄວາມຫຼາກຫຼາຍສີສັນດ້ານອະລິຍະທຳແລະສະແຫວງຫາການພັດທະນາຮ່ວມກັນ. ຊຸກຍູ້ການຮ່ວມມືໃນຂົງເຂດຄວາມໝັ້ນຄົງ, ເສດຖະກິດ,ວັດທະນະທຳແລະອື່ນໆ, ໄດ້ສ້າງໂຕແບບແຫ່ງການພົວພັນລະຫວ່າງຊາດແບບໃໝ່ທີ່ເຄົາລົບນັບຖືເຊິ່ງກັນແລະກັນ, ຍຸດຕິທຳແລະທ່ຽງທຳ, ຮ່ວມມືແບບຕ່າງຝ່າຍຕ່າງມີຜົນໂຫຍດ. ໃນກອງປະຊຸມສຸດຍອດອາສຕານາທີ່ຈັດຂຶ້ນໃນເດືອນມິຖຸນາຜ່ານມາ, ທ່ານປະທານສີຈິ້ນຜິງໄດ້ຮ່ວມກັບບັນດາຝ່າຍບັນລຸຄວາມເປັນເອກະພາບກັນທີ່ສຳຄັນເປັນຕົ້ນ ຮັດແໜ້ນຄວາມສາມັກຄີແລະຄວາມໄວ້ເນື້ອເຊື່ອໃຈກັນ, ເພີ່ມທະວີການຮ່ວມມືດ້ານຄວາມໝັ້ນຄົງ, ເຊື່ອຕໍ່ຍຸດທະສາດການພັດທະນາ, ລົງເລິກການແລກປ່ຽນດ້ານວັດທະນະທຳແລະອື່ນໆ. ຫຼັງກອງປະຊຸມສຸດຍອດ, ຈີນໄດ້ຮັບໜ້າທີ່ເປັນປະເທດປະທານໝູນວຽນອົງການຮ່ວມມືຊຽງໄຮແລະໂດຍໄດ້ຮັບການສະໜັບສະໜູນຢ່າງຕັ້ງໜ້າຈາກບັນດາຝ່າຍ, ຈີນໄດ້ຊຸກຍູ້ການຮ່ວມມືໃນຂົງເຂດຕ່າງໆຂະຫຍາຍຕົວຢ່າງໜັກແໜ້ນ.