ສະຖານທູດລາວ ປະຈຳ ສປ ຈີນຈັດພິທີໂຮມຊຸມນຸມປາຖະກະຖາ ວັນສະຖາປະນາ ສປປ ລາວ ຄົບຮອບ 42 ປີ ແລະ ວັນຄ້າຍວັນເກີດ ປະທານໄກສອນ ພົມວິຫານ ຄົບຮອບ 97 ປີ ໃນວັນທີ 03 ທັນວາ ນີ້ ທີ່ນະຄອນຫລວງປັກກິ່ງ, ໂດຍການປາຖະກະຖາຂອງ ທ່ານ ນາງ ວັນດີ ບຸດທະສະວົງ ເອກອັກຄະລັດຖະທູດແຫ່ງ ສປປ ລາວ ປະຈຳ ສປ ຈີນ,ມີນັກສຶກສາ, ພະນັກງານ ແລະນັກວິຊາການທີ່ປະຕິໜ້າທີ່ຢູ່ນະຄອນຫລວງປັກກິ່ງເຂົ້າຮ່ວມ 250 ກວ່າຄົນ.
ໃນພິທີນີ້,ທ່ານ ນາງ ວັນດີ ບຸດທະສະວົງ ໄດ້ເລົ່າເຖິງມູນເຊື້ອ ແລະ ຄວາມໝາຍຄວາມສຳຄັນຂອງວັນຊາດທີ 2 ທັນວາ, ຜົນສຳເລັດໃນການປົກປັກຮັກສາ ແລະ ພັດທະນາປະເທດຊາດ ຕະຫລອດໄລຍະ 42 ປີ, ສິ່ງທ້າທາຍ ແລະ ອຸປະສັກໃນການພັດທະນາ ປະເທດຊາດ, ການສືບຕໍ່ເສີມຂະຫຍາຍມູນເຊື້ອທີ 2 ທັນວາ ເຂົ້າໃນການສ້າງສາພັດທະນາປະເທດຊາດ ໂດຍສືບທອດມູນເຊື້ອອັນອົງອາດຂອງບັນພະບູລຸດແລະ ປະຊາຊົນລາວບັນດາເຜົ່າພາຍໃຕ້ ການນຳພາຂອງ ພັກປະຊາຊົນ ປະຕິວັດລາວ ໄດ້ສາມັກຄີກັນ ຕໍ່ສູ້ຢ່າງພິລະອາດຫານ ຕ້ານການຮຸກຮານ ແລະ ການຄອບຄອງຂອງຈັກກະພັດລ່າເມືອງຂຶ້ນທັງແບບເກົ່າ ແລະ ໃໝ່ ຈົນສາມາດປົດປ່ອຍ ປະເທດຊາດຢ່າງມີໄຊ, ສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975.
ໂອກາດດຽວກັນນີ້,ທ່ານ ນາງ ວັນດີ ບຸດທະສະວົງ ຍັງໄດ້ເລົ່າເຖິງຊີວິດ ແລະ ການເຄື່ອນໄຫວປະຕິວັດຂອງ ປະທານໄກສອນ ພົມວິຫານ ໃນ ແຕ່ລະໄລຍະ, ຜົນງານແລະຄຸນງາມຄວາມດີຂອງທ່ານ.ສະນັ້ນ,ທຸກຄົນ ຄວນຕັ້ງໜ້າຄົ້ນຄວ້າສຶກສາຮໍ່າຮຽນ ແລະ ສືບທອດມໍລະດົກອັນລ້ຳຄ່າຂອງປະທານໄກສອນ ພົມວິຫານ ທີ່ໄດ້ສ້າງໄວ້ໃຫ້ປະຊາຊົນແລະປະເທດຊາດ.
ຫລັງຈາກນັ້ນ,ກໍ່ໄດ້ມີການສະແດງສິນລະປະ,ຮອ້ງເພງ,ອ່ານກາບກອນແລະຈັບສະຫລາກເອົາ ປີ້ຍົນໄປກັບວຽງຈັນ-ຄຸນໝິງ,ໄດ້ສ້າງຄວາມເບີກບານມ່ວນຊື່ນທີ່ເຕັມໄປດ້ວຍຄວາມໝາຍຄວາມສຳຄັນຢ່າງຫລວງຫລາຍ.