ວັນທີ 3 ທັນວານີ້, ທ່ານ ອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການຜ່ານໂຄສົກຂອງຕົນດ້ວຍການສະແດງຄວາມເປັນຫ່ວງຕໍ່ການປະທະກັນດ້ວຍກຳລັງອາວຸດຢູ່ເຢແມນທີ່ຮ້າຍແຮງຂຶ້ນຕື່ມ ແລະໄດ້ຮຽກຮ້ອງໃຫ້ຝ່າຍຕ່າງໆທີ່ກ່ຽວຂ້ອງຢຸດຍິງທັນທີ.
ຖະແຫຼງການລະບຸວ່າ: ທ່ານ ກູເຕີເຣັສ ໄດ້ສະແດງຄວາມເປັນຫ່ວງຕໍ່ການປະທະກັນດ້ວຍກຳລັງອາວຸດທີ່ເກີດຂຶ້ນຢູ່ນະຄອນຫຼວງຊານາແລະເຂດອື່ນໆຢູ່ປະເທດເຢແມນໃນຫຼາຍມື້ຜ່ານມາ ໂດຍຮຽກຮ້ອງໃຫ້ຝ່າຍຕ່າງໆທີ່ປະທະກັນຮ່ວມມືກັບອົງການສະຫະປະຊາຊາດ ດຳເນີນການເຈລະຈາແບບຜ່ອນສັ້ນຜ່ອນຍາວຄືນໃໝ່ ເພື່ອສະແຫວງຫາຊ່ອງທາງແກ້ໄຂທາງການເມືອງ.
ໃນວັນທີ 29 ພະຈິກຜ່ານມາ, ກຸ່ມປະກອບອາວຸດຮູຊິສ໌ແລະກຳລັງປະກອບອາວຸດທີ່ສະໜັບສະໜູນອະດີດປະທານາທິບໍດີ ອາລີ ອັບດຸນລາຮ໌ ຊາລິຮ໌ ທີ່ເຄີຍຮ່ວມມືຕໍ່ຕ້ານລັດຖະບານເຢແມນໄດ້ປະທະກັນຢູ່ນະຄອນຫຼວງຊານາ ແລະຈາກການປະທະກັນຢ່າງຕໍ່ເນື່ອງ ສົ່ງຜົນເຮັດໃຫ້ເກືອບ 1 ຮ້ອຍຄົນເສຍຊີວິດແລະບາດເຈັບຫຼາຍຮ້ອຍຄົນ.
 |
