ໜັງສືພິມເສດຖະກິດລາຍວັນຂອງຈີນລາຍງານວ່າ: ວັນທີ 5 ທັນວານີ້, ເຮືອສະມາດລຳທຳອິດຂອງໂລກທີ່ຈີນຄົ້ນຄວ້າຜະລິດໄດ້ເລີ່ມນຳໃຊ້ຢ່າງເປັນທາງການຢູ່ກຳແພງນະຄອນຊຽງໄຮ ຫຼັງໄດ້ຮັບການຢັ້ງຢືນຈາກສະຖາບັນ Lioyd´s Register of shipping ເປັນລຳທຳອິດຂອງໂລກ ເຊິ່ງເປັນຂີດໝາຍສະແດງໃຫ້ເຫັນວ່າເຕັກນິກການຜະລິດເຮືອສະມາດຂອງຈີນໄດ້ກ້າວຂຶ້ນສູ່ລະດັບແຖວໜ້າຂອງໂລກ.
ເຮືອສະມາດຂົນສົ່ງສິນຄ້າ "ຕ້າຈື້" ທີ່ເລີ່ມນຳໃຊ້ໃນມື້ດັ່ງກ່າວມີຄວາມຍາວເຖິງ 179 ແມັດ,ກວ້າງ 32 ແມັດ, ສູງ 15 ແມັດ, ສາມາດບັນທຸກສິນຄ້າໄດ້ 3 ໝື່ນ 8 ພັນ 800 ໂຕນ ໂດຍກຸ່ມບໍລິສັດອຸດສາຫະກຳເຮືອຈີນຄົ້ນຄວ້າແລະຜະລິດ ຈຸດພິເສດທີ່ສຳຄັນທີ່ສຸດຂອງເຮືອລຳດັ່ງກ່າວຄືໄດ້ຕິດຕັ້ງໃຫ້ມີ "ສະໝອງ"ທີ່ສະຫຼາດ,ເຮືອສາມາດວິເຄາະຕົວເລກແລະຂໍ້ມູນທີ່ຕົນເກັບໄວ້,ສາມາດສະໜອງຂໍ້ສະເໜີຊ່ວຍປັບປຸງເສັ້ນທາງການເດີນເຮືອໃຫ້ດີຂຶ້ນ, ລວມທັງເປັນຜູ້ຊ່ວຍນາຍເຮືອໃນການກຳນົດເສັ້ນທາງການເດີນເຮືອ. ນອກນີ້,ເມື່ອທຽບໃສ່ເຮືອຂົນສົ່ງສິນຄ້າທົ່ວໄປທີ່ສາມາດບັນທຸກສິນຄ້າໃນນ້ຳໜັກຂະໜາດດຽວກັນນັ້ນ ຖືວ່າປະສິດທິພາບໄດ້ຮັບການຍົກສູງຂຶ້ນ 3% ແລະຈາກການແລ່ນໃນກໍລະນີມີຄວາມໄວເທົ່າກັນນັ້ນ ສາມາດຫຼຸດການສິ້ນເປືອງນ້ຳມັນເຊື້ອໄຟສະເລ່ຍ 4% ຕໍ່ມື້.
 |
