ສື່ມວນຊົນໄທລາຍງານໃນວັນທີ 7 ທັນວານີ້ວ່າ: ຊາຍທີ່ກໍ່ເຫດລະເບີດໂຮງໝໍແຫ່ງໜຶ່ງໃນບາງກອກເມື່ອເດືອນພຶດສະພາປີນີ້ ໄດ້ຖືກສານຕັດສິນຈຳຄຸກ 27 ປີໃນວັນທີ 6 ທັນວານີ້.
ທັງນີ້ເມື່ອວັນທີ 22 ພຶດສະພາຜ່ານມາ, ໂຮງໝໍແຫ່ງໜຶ່ງໃນໃຈກາງນະຄອນຫຼວງບາງກອກໄດ້ເກີດເຫດການລະເບີດ ສົ່ງຜົນເຮັດໃຫ້ມີຜູ້ບາດເຈັບ 21 ຄົນ ແລະທົ່ວສັງຄົມເກີດຄວາມວິຕົກເປັນຢ່າງຍິ່ງ. ຫຼັງຈາກສືບສວນຢ່າງລະອຽດແລ້ວ ຈຶ່ງໄດ້ຈັບຜູ້ຕ້ອງສົງໄສຜູ້ໜຶ່ງທີ່ວາງລູກລະເບີດ ໂດຍຜູ້ກ່ຽວເປັນຊ່າງໄຟຟ້າບຳນານ ອາຍຸ 62 ປີ ແລະໄດ້ພົບເຄື່ອງປະກອບລູກລະເບີດຢູ່ເຮືອນຂອງຜູ້ກ່ຽວ.
ຫຼັງການສືບສວນ-ສອບສວນ, ຜູ້ຕ້ອງສົງໄສໄດ້ຮັບສາລະພາບວ່າຕົນເປັນຜູ້ຜະລິດລະເບີດແລະວາງລະເບີດຢູ່ໂຮງໝໍ ເພື່ອສະແດງຄວາມບໍ່ພໍໃຈຕໍ່ລັດຖະບານ.