ພາຍຫຼັງອາເມລິກາປະກາດ ຮັບຮອງເຢລູຊາແລມເປັນນະຄອນຫຼວງອິດສະຣາແອນ ແລະ ຈະເລີ່ມຍ້າຍສະຖານທູດປະເທດຕົນປະຈຳອິດສະຣາແອນຈາກເຕັນອາວິບໄປເຢລູຊາແລມໃນວັນທີ 6 ທັນວານີ້ ໄດ້ເຮັດໃຫ້ອົງການຈັດຕັ້ງສາກົນ ເຊັ່ນ ສະຫະປະຊາຊາດ ແລະ ປະເທດຕ່າງໆ ເຊັ່ນເອຢິບ, ອັງກິດ ແລະອື່ນໆ ໄດ້ທະຍອຍກັນອອກມາຄັດຄ້ານ ໂດຍເຫັນວ່າ ມັນຈະທຳລາຍສະຖຽນລະພາບຂອງພາກພື້ນ.
ທ່ານ ອັນໂຕນີໂອ ກູເຕີເລັສ ເລຂາທິການໃຫຍ່ອົງການສະຫະປະຊາຊາດ ໃຫ້ສຳພາດຕໍ່ສື່ມວນຊົນວ່າ, ຕົນຄັດຄ້າດທຸກມາດຕະການຝ່າຍດຽວທີ່ອາດຈະທຳລາຍອະນາຄົດແຫ່ງສັນຕິພາບຂອງປາແລັສຕີນ-ອິດສະຣາແອນຢ່າງເປີດເຜີຍຕະຫຼອດມາ. ສ່ວນບັນຫາຖານະຂອງເຢລູຊາແລມ ຕ້ອງໃຫ້ປາແລັສຕີນ-ອິດສະຣາແອນແກ້ໄຂດ້ວຍການເຈລະຈາໂດຍກົງອີງຕາມມະຕິທີ່ກ່ຽວຂ້ອງຂອງສະພາຄວາມໝັ້ນຄົງແລະສະມັດຊາໃຫຍ່ບົນພື້ນຖານພິຈາລະນາເຖິງຜົນປະໂຫຍດອັນຊອບທຳທີ່ສອງຝ່າຍສົນໃຈ. ນອກຈາກ "ແຜນການສ້າງເປັນສອງປະເທດ" ແລ້ວ, ຈະບໍ່ມີທາງເລືອກອື່ນໃດອີກ.
ຄະນະຜູ້ຕາງໜ້າຖາວອນຂອງຝຣັ່ງປະຈຳອົງການສະຫະປະຊາຊາດ ກ່າວວ່າ, ສະພາຄວາມໝັ້ນຄົງຈະໄຂກອງປະຊຸມສຸກເສີນກ່ຽວກັບເລື່ອງນີ້ໃນວັນທີ 8 ທັນວານີ້ ຫຼັງການຮຽກຮ້ອງຂອງ 8 ປະເທດ ເຊັ່ນ: ຝຣັ່ງ, ອັງກິດ, ເອຢິບ ແລະອື່ນໆ.
ທ່ານນາງ ເທເຣຊາ ເມ ນາຍົກລັດຖະມົນຕີອັງກິດ ຖະແຫຼງວ່າ, ອັງກິດບໍ່ເຫັນດີຕໍ່ການຕົກລົງດັ່ງກ່າວຂອງອາເມລິກາ ແລະ ເຫັນວ່າ ການຕົກລົງນີ້ ບໍ່ມີຜົນດີຕໍ່ສັນຕິພາບຂອງພາກພື້ນ. ປັດຈຸບັນ, ສະຖານທູດອັງກິດປະຈຳອິດສະຣາແອນ ໄດ້ຕັ້ງຢູ່ເຕັນອາວິບ ແລະກໍບໍ່ມີແຜນການທີ່ຈະຍ້າຍສະຖານທູດ. ທ່ານນາງ ເທເຣຊາ ເມ ຍັງໄດ້ກ່າວຢ້ຳເຖິງຫຼັກໝັ້ນຂອງອັງກິດກ່ຽວກັບບັນຫາຖານະເຢລູຊາແລມຢ່າງສະເໝີຕົ້ນສະເໝີປາຍ.