ວັນທີ 9 ທັນວາຕາມເວລາທ້ອງຖິ່ນ, ກອງປະຊຸມ "ໂຄງການຈີນ" ກ່ຽວກັບການຊຸກຍູ້ປະເທດດ້ອຍພັດທະນາເຂົ້າຮ່ວມເປັນສະມາຊິກອົງການການຄ້າໂລກຫຼື WTO ຄັ້ງທີ 6 ໄດ້ຈັດຂຶ້ນຢູ່ບຸຍເອນົກອາຍເລັສ ນະຄອນຫຼວງອັກຊັງຕິນ, ທ່ານຈົ່ງຊ່ານ ລັດຖະມົນຕີກະຊວງການຄ້າຈີນນຳຄະນະຜູ້ແທນເຂົ້າຮ່ວມ ແລະກ່າວປາໄສໃນພິທີເປີດກອງປະຊຸມ.
ທ່ານຈົ່ງຊ່ານໄດ້ປະກອບຄຳເຫັນ 4 ຂໍ້. ຄື ໜຶ່ງ ການລົບລ້າງຄວາມທຸກຍາກແມ່ນພາລະກຳຮ່ວມຂອງສັງຄົມມະນຸດ, ສອງ ລະບຽບການຄ້າຫຼາຍຝ່າຍແມ່ນສິ່ງຄ້ຳປະກັນສຳຄັນແຫ່ງຄວາມຈະເລີນຮຸ່ງເຮືອງຮ່ວມກັນ, ສາມ ປະເທດດ້ອຍພັດທະນາເຂົ້າຮ່ວມ WTO ຕ້ອງການການສະໜັບສະໜູນທີ່ຮອບດ້ານແລະສີ່ ຈີນຍິນດີຊ່ວຍເຫຼືອປະເທດດ້ອຍພັດທະນາ.
ໃນໄລຍະປະຊຸມ, ທ່ານຈົ່ງຊ່ານກັບທ່ານໂຣເບີໂທ ອາເຊວິໂດ ຜູ້ອຳນວຍການໃຫຍ່ WTO ໄດ້ເຊັນບົດບັນທຶກຄວາມເຂົ້າໃຈກັນກ່ຽວກັບ "ໂຄງການຈີນ" ໄລຍະທີ 7 ຂອງ WTO ແລະບົດບັນທຶກຄວາມເຂົ້າໃຈກັນກ່ຽວກັບການບໍລິຈາກແລະການຮ່ວມມືກອງທຶນສັນຍາສ້າງຄວາມສະດວກໃຫ້ແກ່ການຄ້າ WTO.
 |
