ທ່ານເຈັຟຣິ ເຟນທ໌ມັນ, ຮອງເລຂາທິການໃຫຍ່ອົງການສະຫະປະຊາຊາດທີ່ຮັບຜິດຊອບວຽກງານການເມືອງໄດ້ແຈ້ງສະພາບການຢ້ຽມຢາມ ສປປ ເກົາຫຼີຂອງຕົນຕໍ່ສື່ມວນຊົນໃນວັນທີ 9 ທັນວານີ້, ໂດຍເນັ້ນຄວາມເລັ່ງດ່ວນການຜ່ອນຄາຍສະຖານະການແຫຼມເກົາຫຼີ, ແລະກ່າວຢ້ຳຄວາມສັນຄັນທີ່ແກ້ໄຂບັນຫາແຫຼມເກົາຫຼີດ້ວຍວິທີການເມືອງ.
ທ່ານເຟນທ໌ມັນໄດ້ເດີນທາງຢ້ຽມຢາມ ສປປ ເກົາຫຼີແຕ່ວັນທີ 5 ຫາວັນທີ 8 ທັນວານີ້, ໂດຍໄດ້ປຶກສາຫາລືກັບທ່ານຣິຢຸງໂຮ ລັດຖະມົນຕີກະຊວງການຕ່າງປະເທດແລະທ່ານປັກມິງກຸກ ຮອງລັດຖະມົນຕີກະຊວງການຕ່າງປະເທດ ສປປ ເກົາຫຼີກ່ຽວກັບບັນຫາທີ່ສອງຝ່າຍສົນໃຈຮ່ວມກັນ, ແລະແລກປ່ຽນຄວາມເຫັນກ່ຽກກັບບັນຫາແຫຼມເກົາຫຼີ, ທັງເປັນເອກະສັນກັນເຫັນວ່າ "ສະຖານະການແຫຼມເກົາຫຼີແມ່ນບັນຫາສັນຕິພາບແລະຄວາມໝັ້ນຄົງທີ່ເຄັ່ງຕຶງທີ່ສຸດແລະອັນຕະລາຍທີ່ສຸດໃນໂລກປັດຈຸບັນ"
ໃນໄລຍະຢ້ຽມຢາມ, ທ່ານເຟນທ໌ມັນໄດ້ເນັ້ນຄວາມຈຳເປັນຕໍ່ ສປປ ເກົາຫຼີກ່ຽວກັບການປະຕິບັດມະຕິທີ່ກ່ຽວຂ້ອງຂອງສະພາຄວາມໝັ້ນຄົງອົງການສະຫະປະຊາຊາດຢ່າງຮອບດ້ານ. ຂະນະດຽວກັນທ່ານຊີ້ວ່າ, ຄວນປ້ອງກັນບໍ່ໃຫ້ມີການວິນິໄສທີ່ຜິດພາດຕໍ່ສະຖານະການ, ຄວນຫຼຸດຄວາມສ່ຽງການປະທະກັນໂດຍຜ່ານຊ່ອງທາງທີ່ເປີດເຜີຍ. ປະຊາຄົມໂລກຮູ້ສຶກຄວາມເປັນຫ່ວງຕໍ່ສະຖານະການທີ່ນັບມື້ນັບເຄັ່ງຕຶງຂຶ້ນ, ແລະພວມພະຍາຍາມຊອກຫາວິທີແກ້ໄຂໂດຍສັນຕິ.
ນີ້ແມ່ນເຈົ້າໜ້າທີ່ຂັ້ນສູງອົງການສະຫະປະຊາຊາດລະດັບຮອງເລຂາທິການໃຫຍ່ໄປຢ້ຽມຢາມ ສປປ ເກົາຫຼີຄັ້ງທຳອິດໃນຮອບ 6 ປີຜ່ານມາ.