ທ່ານຫຼີກ້ານເຈ ລັດຖະມົນຕີກະຊວງອະນຸລັກສິ່ງແວດລ້ອມຈີນຢືນຢັນໃນວັນທີ 10 ທັນວານີ້ວ່າ: ລັດຖະບານຈີນໄດ້ປະກາດແລະປະຕິບັດແຜນການດຳເນີນງານປ້ອງກັນມົນລະພິດທາງອາກາດ, ນ້ຳ ແລະດິນ ໂດຍສາມາດຍາດໄດ້ຜົນສຳເລັດຢ່າງພົ້ນເດັ່ນ. ໃນໄລຍະ 5 ປີຜ່ານມາ, ຮູບແບບການຄຸ້ມຄອງສິ່ງແວດລ້ອມທຳມະຊາດທີ່ມີສີສັນພິເສດຂອງຈີນໄດ້ເປັນຮູບເປັນຮ່າງຂຶ້ນໂດຍພື້ນຖານແລະໄດ້ຮັບປະສິດທິຜົນອັນພົ້ນເດັ່ນໃນບັ້ນຮົບແກ້ໄຂມົນລະພິດທີ່ເຮັດຢ່າງເອົາຈິງເອົາຈັງ ເຫັນໄດ້ຈາກການຊຸກຍູ້ສົ່ງເສີມການແກ້ໄຂມົນລະພິດ ຢ່າງແຂງແຮງ ການແກ້ໄຂບັນຫາມົນລະພິດບໍ່ພຽງແຕ່ໄດ້ສ້າງຜົນດີຕໍ່ດ້ານສິ່ງແວດລ້ອມເທົ່ານັ້ນ ຍັງໄດ້ສົ່ງຜົນດີເຖິງດ້ານເສດຖະກິດແລະສັງຄົມນຳອີກ.
ທ່ານຫຼີກ້ານເຈໃຫ້ຮູ້ວ່າ: ຕາມສະຖິຕິ, ຈີນສາມາດສຳເລັດການປັບປຸງອຸປະກອນແລະເຕັກນິກການຜະລິດຂອງໂຮງງານໄຟຟ້າຖ່ານຫີນໃຫ້ຫຼຸດການລະບາຍມົນລະພິດໃຫ້ສຳເລັດແລ້ວ 640 ລ້ານກິໂລວັດ ກວມຍອດຈຳນວນເຄື່ອງຈັກຜະລິດໄຟຟ້າຖ່ານຫີນເຖິງ 68%, ໂຮງໄຟຟ້າຖ່ານຫີນສາມາດຫຼຸດການປ່ອຍຊຸນເຟີດີອົກຊິດ 83%, ນີໂຕຣແຊນອົກຊິດ 50% ແລະຄວັນໄຟ 67%, ແລະການສ້າງລະບົບຜະລິດໄຟຟ້າຖ່ານຫີນປອດມົນລະພິດທີ່ໃຫຍ່ທີ່ສຸດໃນໂລກ. ນັບແຕ່ເດືອນມັງກອນຫາເດືອນພະຈິກ ປີ 2017ນີ້, ຄວາມເຂັ້ມຂຸ້ນຂອງອະນຸພາກຝຸ່ນລະອອງຂະໜາດນ້ອຍກວ່າ 10ໄມຄຣອນລົງມາ(PM 10) ທີ່ສາມາດຫັນໃຈເຂົ້າປອດໄດ້ຢູ່ 338 ຕົວເມືອງໃນທົ່ວປະເທດຈີນໄດ້ຫຼຸດລົງ 20,4% ເມື່ອທຽບໃສ່ໄລຍະດຽວກັນຂອງປີຜ່ານມາ.
 |
